Myanmar Idol ah hlasak aa zuammi Chin pa Benjamin Sum

Myanmar Idol ah hlasak aa zuammi Chin pa Benjamin Sum

Atu lio Kawlram ah tuahmi Myanmar Idol hlasak zuamnak ah Chin pa Benjamin Sum aa zuam ve. An nih hi Kalaymyo in a rak i zuammi a si. Thazaang pe cio hna usih.

Benjamin cu Kalay i Computer University ah a kum 2nk a kai liomi a si.

“Ka nunnak ah lungrawhnak tampi ka tong. Ka ngeihchun cu ka nu lawng a si i, ka nu cu cancer zawtnak stage 3 a si ahhin a ka thih tak sual lai ka phang tuk. Ka pa thih hnu in keimah he lawng kan um tti.”

Benjamin le a nu Lal Din Par

“Ka nu cu va dang a ngei ti lo. Cu ruangah, ka nu caah tampi i zuam ka duh,” tiah Benjamin nih a chim.

Benjamin a nu Lal Din Par hi awtha minthang pakhat a si ve. A hla rak ngai chih lawlaw ve.

Benjamin nih “music ahcun rock, pop le jazz phun ka uar. Cun, 5 second of summber band hi ka uar bik hna i an hla zong ka uar tuk hna. Hla ka cawn ah guiter tum pah in ka cawng. Aw hi biapi in ka chiah,” tiah a chim fawn.

Benjamin cu Hallelujah hla a sa. Biakhiaktu Phyu Phyu Kyaw Thein cu hla a sak dih in a dir i ‘dirpiak phu na si’ a ti, Kawl hla fung 1 a sak ter. Benjamin cu Golden Ticket a ngah. Yangon ah pehzulh in aa zuam rih lai.

Myanmar Idol Season 4 hlasak zuamnak ahhin Chinmi chung in a dang aa zuammi zong an um len.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.