India, Thailand, Singapore, South Korea le Japan ram ah aa tapmi Kawlrammi tampi cu Myanmar cozah nih vanlawng in a lak hna lai, tiah Myanmar Ramdang Vuanci Zung nih a thanh.

India, Thailand le Singapore ram ah a ummi airport pawl ah Myanmar rammi pawl i tonnak hmun dang tein ser a si cang.

“A hmasabik ah tar le visa a thi i a ngandam lomi pawl papek (usape) in kan lak hna lai,” tiah ttuanvo ngeitu U Aung Kyaw Zan nih a chim.

Ramdang phan Kawlrammi pawl laknak dingah MAI vanlawng company he zong hnatlaknak an ngei cang.

Myanmar cozah nih vanlawng a kal lei ca cu a liam lai i kirnak tu cu mah tein i ticket cawk ding a si.

Ramdang ah aa tapmi Kawlrammi pawl cu May thla zarh khatnak ah kan lak khawh hna lai, tiah Ramdang Vuanci Zung nih a ruahchan.

Japan ram ah a ummi Kawlrammi 168 cu hmai thla chungah All Nippon vanlawng in Myanmar ram an phan lai tiin kan ruah tiah Ramdang Vuanci Zung in biachimtu U Aung Kyaw Zan nih a chim.

MAI vanlawng cu South Korea ah zuanter dingin kan timhtuah tiah U Aung Kyaw Zan nih a chim fawn.

South Korea ah rian a ttuanmi, sianginn a kaimi le tinbaw rianttuan telhin Kawlrammi 350 hrawng nih Myanmar ram tlung dingin Seoul khuapi um Myanmar tanzung ah an sok tiah tanzung palai U Zay Tin Win Htin nih a chim.

April 30 ah a zuang dingmi vanlawng ahhin minung 97 lawng a phorh hna lai tiah U Zay Tin Win Htin nih a chim.

Malaysia, Philippines le Europe ah a phanmi Kawlrammi pawl zong la kho dingin khua kan khan tiah Ramdang Vuanci Zung nih a ti.

Ramdang in a rak kirmi Kawlrammi pawl cu Facility Quarantine Center ah ni 21 an um lai cu hnu ah mah le inn cio ah ni 7 chung an um rih lai ti a si.

Myanmar ram ahcun Covid-19 zawtnak in a dammi 16 an si cang i ram pumpi ah zawtnak ngeimi minung 146 a si. – The Irrawaddy Burmese

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.