Myanmar cozah nih China ram ah hriamtlai bu ‘Northern Alliance’ a ton hna

Myanmar cozah nih China ram ah hriamtlai bu 'Northern Alliance' a ton hna

Myanmar cozah Remdaih Khuakhannak bu (PC) nih tlangcung hriamtlai bu Northern Alliance group hruaitu 3 cu nizaan ahkhan China ram ah a ton hna.

July thla tanttim ahkhan Northern Alliance hruaitu hna cu Rampi Remdaih Khuakhnnak (UPC) ah kai dingin Naypyitaw ah an rak ra, mah lio ahcun cozah he China ram ah i tong te dingin hnatlaknak an rak ngeih bangin nizaan ah an i ton hi si.

Ta’ang Miphun Luatnak Ralkap (TNLA) ralbawi Tar Phone Kyaw nih, “Nithumni ah cozah palai pawl le hriamtlai bu TNLA, AA le Kokang hrambunh MNDAA cu meeting kan tuah hna. Meeting kan tuah hnawhchan cu hriamtlai bu le cozah kan i zumh khawhnak hnga caah si, caan saupi chung kan i zum kho bal hna lo cu awh,” tiah a chim.

Meeting ah a kalmi cozah palai pawl cu PC Vice President U Then Zaw le Secretary U Khin Zaw Oo an si. An 2 ningin ralkap bawi hlun an si.

“Remdaihnak kong ceih chap dingin kan lungtling i hmai thla khi kan i tong tthan hna lai,” tiah TNLA ralbawi Tar Phone Kyaw nih a chim.

“Meeting ahcun KIO/A le UWSP/A aiawhtu zong an i tel ve,” a ti.

“Remdaihnak kong ceih deuh ding le i kahnak zorter deuh ding kong kan i ruah hna. NCA kong le naite i kahnak kong cu kan ceih lo.”

“Cozah he khat le khat kan rak i zum kho lo. Atu zong cu biaruah kan pehzulh ka lawng a si rih bang, zeihmanh a dikthlir in kan ceih kho rih lo. Nain, khat le khat kan i zum kho tthan cang, cucaah ral i tuk lo dingin biaruahnak kan tuah kho chin lengmang lai ti ka zumh,” tiah a chimchap.

Meeting a kai vemi dang pawl le cozah palai pawl cu The Irrawaddy nih an chawnh hna nain an chawn kho hna lo.

TNLA cu Shan State chaklei i Kut Kai, Nam San, Man Tong le Namtu peng hna ah Myanmar ralkap he aa kap lengmangmi a si.

TNLA cu Ram Pumpi Kahngol Hnatlaknak (NCA) minsen a thumi RCSS he zong Namtu pengah an rak i kah caah khuate 13 leng in khuami 2,000 deng an rak zaam. — The Irrawaddy

Leave a Reply

Your email address will not be published. Required fields are marked *