15.3 C
Hakha
Thursday, September 23, 2021
- Advertisement -

Ṭial Tharmi

Myanmar mipi nih CDM kan tuahmi cu Nobel Peace Prize pek dingin a kan halpiak

Myanmar mipi nih buai lo tein ralkap duhlo langhternak (CDM) kan tuahmi cu Norway khualipi um University of Oslo professor 6 nih “Nobel Peace Prize laksawng pek awktlak asi” tiin Nobel Peace Prize laksawng a kan halpiak.

“CDM a lutmi pawl cu tlaih, hrem le thah in an tlerh hna nain thih le thih tiin buainak tel lo tein an lut cio. Uknak ṭha loin an luat khawhnak hnga, zungkaimi kai loin CDM an lut, mipi zong buainak tel lo tein lam an zawh. Buainak tel lo tein ralkap duhlo langhternak asi caah Nobel Peace Prize laksawng pek phu asi tiin kan halpiaknak si,” tiah Professor Kristian Stokke nih a chim.

Tu kum Nobel Peace Prize laksawng halpiak caan cu January 31 ahkhan an khar cang caah hmai kum 2022 Nobel Peace Prize tu an halpiak hi si.

Nobel Peace Prize (Nobel Daihnak Laksawng) cu a ngah lai maw?

Chim a har ngai. 2022 Nobel Peace Prize halpiak (nominate) caan cu hmai kum January 31 tiang asi. Myanmar CDM lawng si loin adang pumpak, bu le cawlcanghnak zong an halpiak cio hna lai.

An halpiakmi hna vialte cu Norway um Nobel Peace Prize petu bu nih a zohfel hna lai i ‘hi cu ruahpiak awk a tlak lo’ a timi paoh cu a hlonh hna lai.

“Ruahpiak a phu ko” a timi pawl cu 2022 October thla ah Nobel Peace Prize petu bu member nih vote an thlak lai i vote tambik a ngahtu kha ngahtu (winner) asi te lai.

Nobel Peace Prize ngahtu (winner) cu October thla ah an thanh lai i laksawng peknak puai cu December ah an tuah lai. Nobel Laksawng kong cu mah hi hmet law ka ṭial ciami ah tling deuh in rel khawh asi.

2020 Nobel Peace Prize cu World Food Program (WFP) nih a ngah. WFP cu UN nih a dirhmi, vawlei cung ramkip ah hartong pawl tirawl a petu bu asi. Chin state, Paletwa peng zongah Chin ralzaam pawl rawl a rak pek hna.

Ralkap nih an huat tuk lai

Myanmar CDM cu Nobel Daihnak Laksawng pek dingin an halpiak ruang ah ralkap nih uknak an chia hlei lai lo, an lung zong an ṭhul hlei lai lo. Nain, ralkap hi Nobel Daihnak Laksawng a hua ngaimi an si caah mah thawngpang an theih cu an huat ngai lai, tiah Norwegian Burma Committee (NBC) hruaitu hlun Audun Aagre nih a chim.

NBC cu Myanmar ram ah democracy a len khawhnak hnga Norway cozah forhfialtu NGO a rak si. Kum 1991 ah Aung San Suu Kyi nih Nobel Daihnak Laksawng a ngah hnu 1992 ah an rak dirhmi si.

Norway cozah nih “Myanmar cu democracy lam a panh cang” ati i NBC cu bawmhnak tangka a pek ti lo caah Audun Agre cu hruaitu in aa din ve.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -