7.2 C
Hakha
Tuesday, December 10, 2019
More

    Mon state ah leimin in minung 52 an thi cang, 40 an tlau rih

    Follow Us

    99,417FansLike
    260SubscribersSubscribe

    Ṭial Tharmi

    - Advertisement -

    Furpi ruah fak tukin a sur ruangah Mottama khua ah fak tukin vawlei a min i khuaci an mui. Mon state ah leimin in minung 52 an thi cang, tiah state cozah rianttuan nih an chim.

    Mi khamhtu pawl cu atutiang Paung peng i Mottama khua tlang hram ah mitlau an kawl peng rih.

    Ningani zingka 8am ah Mottama khua i tlang nganpi a cim.

    Paung peng GAD bawi U Zaw Moe Aung nih, “lei a minhnak hmun ah Zarhpini zingka ah miruak 11 an hlai. Hmasa i miruak an hmuhmi he cun 52 asi cang,” tiah a chim.

    Leimin nih inn 25 le mawttaw 5 a phum hna.

    Mottama khua leimin

    Ni 2 chung a pehpeh in ruahpi a sur hnu ah vawlei a minh hi si, tiah khuacung cozah rianttuan nih an chim.

    Vawlei a minh lio ahhin a hmun ah minung 100 leng an um, tiah khua cozah nih a zumh. A hmun um lawng si loin khualtlawng le pawngkam aa chawkmi minung 40 paoh an tlau rih, tiah zumh asi.

    Thae Phyu Kone khuate ah a ummi kum 40 pa U Thet Naing Oo nih, “ka chungkhat ruak 5 cu Zarhterni ah an hmuh, ka fanu tleirawl 2 an tlau rih,” tiah a chim.

    “Ni 3 a si cang caah an nung rih lai ti cu kaa ruahchan ti lo. Nain an ruak tal cu hmuh ka duh ko. Vawlei a minh lio ahhin inn ah ka um lo. Seconds tlawmpal chungah a min viar. Mipi zaam caan an ngei lo. Zeizong vialte kan sung dih,” tiah a chimchap.

    Mottama khua leimin mitlau an kawl lio

    Hmun dang 2 ah vawlei a min ve i inn 2 a hrawh nain minung cu a hliam hna lo, tiah U Zaw Moe Aung nih a chim.

    Mon state hi ni kum zongah hi bantuk in vawlei a min len cang.

    Ye Peng

    Mon state Ye peng ah ti a lian peng rih. Ti lian nih phone lines tiang a hrawh caah mi khamhtu pawl an i tuai lulh ko.

    Khua chung lam tampi tilian nih a khuh dih nain, atu cu pe 3 hrawng a zor cang. Khua chung i chawh tikah hmasa ti nih a khuhmi lam zong an lang pah len cang, tiah zatlang bu hruaitu Min Aung Htoo nih a chim.

    Ye peng tilian a zornak hmun 1

    Nain, ti a lianh peng rih caah Ye peng ah mi khamh rian a har ngai rih. Penguk cozah nih dornak camp 4 an sakmi ah minung 7,000 kan dorter cang hna.”

    “Mi tampi cu tilian a kai lai lo ti ruat in inn ah an um hna. An inn ah ti a luh hnu ceo ah mi khamhtu bu an chawnh. Atu hi bawmh haltu an tamtuk caah, mi khamhtu an thilri le an milu thazaang an i za huaha ti lo.”

    “Mi khamhtu bu pawl nih an si khawh chungin an khamh hna nain, lawng a za in an ngei lo,” tiah a chimchap.

    Ye peng ahcun atutiang tilian ruangah a thimi an um rih lo.

    Mon state chung hmun dangdang zongah tilian le leimin hme tete an um len.

    June thla dongh lai in August 10 tiangah Myanmar ram chungah state le region 14 chungah 11 ah tilian a tlung. Minung 152,031 harnak an tong. Mah chungah 145,859 cu an inn in dornak camp 346 ah kan tthial hna, tiah Zatlang Zohkhenhnak, Mi Khamhnak le Tthialkamnak Vuanci Zung nih tuni ah a thanh.

    Vice President Pahnihnak Henry Van Thio le Zatlang Zohkhenhnak Vuanci U Win Myat Aye nih vawlei a minhnak hmun cu zahan ah an va tlawn. Tuni ah Ye pengah tilian hartong an va zoh hna.

    Tthialmi pawl an rawl le herhhai caah tangka ting thong 3 dengmang (293.5 million kyats) kan hman cang, tiah Zatlang Zohkhenhnak Vuanci Zung nih a chim.

    Zarhpini tiangah; Karen, Mon, Bago, Irrawaddy, Tannitharyi, Sagain, Mandalay le Magwe telh in state/region 8 um chungkhar 15,920 (milu 70,917) cu dornak camp ah an tthial cang hna.

    Mon state le Bago region ah harnak fak bik an tong. — The Irrawaddy

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.