April 12 zinglei ah Myanmar hlasak thiam Assani@Han Tun Zaw (kum 32) nih a nungak tthing model Sue Sha Htet cu voi 2 a tlaihhrem pinah taksa fahnak a pek tiin April 13 ah Ramchung Vuanci Zung nih a thanh.

“Ka hawile he bar kan um lio ah Assani (Iz Sa Ni) nih phone a ka chawnh. Leng ah rak chuak, na duh lo ahcun na mul kan phoh lai a ka ti. Ningzah pah in ka va auh. Kan pawngah a tthu ve i buainak lawngte a kawl.

Kei ka ttin cang lai va tin ve cang ka ti. Inn ttin a duh lo, taxi ka hlanmi ah a kai ve. Kan inn ka phak ahcun ka tawh a ka chuh i tawh a hun. Inn chung kan luh hnu ah a ka velh i ka thil vialte a ka phoih dih. Cun, tlaihhrem a ka timh.

Tlaihhrem a ka timhmi cu ka duh lo caah ka hmai ah a ka thongh, ka lu cu vanpang ah a suk chih. Ka hmai a ka thonghnak ah ka haa zong a tlong. Cun, ka kut tin zong an pawk.

Nu le pa tha cu aa thlau tuk kaw mah tin a ka tthuat cang ahcun ka lungfim huaha ti lo. Mah ahcun a ka tlaihhrem. Ka lungfim ti lo caah ti chungah ka lu a ka nok. Cun, a ka tlaihhrem tthan. Ka lung a hung fim ahcun mi bawmh ka hal lai ka ti nain thlalang kuai in ka ke a ka ah caah zeihmanh ka tuah kho lo.

Ka phone 2 cu ka zaktang ah ka ceh i ka taksa a fak tuk cang, zaangfah tein zunput ka kal ta ko lai tiah ka nawl. Zunput chungah innka tawh kaa hrenh i ka hawinu ka chawnh. Mah lio ahhin zunput innka hram in a ka hngah. Ka hawile 2 ka chawnh hna. Ka hawile 2 nih sang upa le palek an sawm chih hna.

Ka hawile an phan ti ka theih i tawh ka hun hna lai ka ti ahcun tawh 1 a rak hlonh cang. Asinain, vantthat ah TV pawngah tawh dang a um. Mah tawh cu rianrang in ka va lak i a tangah a cheh (pek hna). Ka hawile 2, sang upa le palek pawl ruangah atu bantuk in ka nun hi a si,” tiah Model Sue Sha Htet nih Myanmar Celebrity ah a chim.

Model Sue Sha Htet le Assani hi thla 5,6 hrawng an i duh hnu ah Sue Sha Htet nih a kal takmi a si.

“Tuan ah a zia ka rak thei lo. Kan i duh thla 5,6 hnu hrawngah a zia ka uar lo caah keimah ka phiat. Mah hnu ahcun atu le tu phone a ka chawnh i a ka thlerh. Leng kan chuah lio ah mi theih in a ka velh i ka tlik caan zong um. Lampi ah a ka hmuh zongah a ka velh,” tiah Sue Sha Htet nih a chim.

A tanglei video ah tlamtling deuhin zoh khawh a si.

Zeitin na ruah?

Zaangfah na comment ṭial!
Zaangfah tein ka hin a min ṭial