“Miss Thuzar Wint Lwin nih ralzaam caah Kawlram tangka ting 5 na kan hlut caah kan i lawm tuk,” tiah Thantlang peng Chin ralzaam bawmtu Thantlang Placement Affairs Committee nih lunglawmhnak certificate a chuah.
Miss Thuzar nih a hlutnak hna kong cu Thantlang Placement Affairs Committee upa Salai Vel Ceu Cung nih atanglei bangin a chim.
Tuni ah Kawlpa pakhat nih phone a ka chawnh i, “Birthday lawmhpi nak caah tiin Thantlang ralzaam caah phaisa pekchanh ka duh ve,” a ka ti.
“Aw, a ṭha tuk. Aho birthday dah si lai?” tiah ka hal.
“Hakha thuam in Miss Universe ah ai zuammi Thuzar Wint Lwin Birthday caah asi. October 18 hi amah birthday asi i a birthday lawmhpi nak ah pekchanh ka duhmi asi. Kan hlutmi hi roca na kan pe lai maw? Roca in Birthday wish tuah ka duh,” tiah a ka ti.
“Aw, kan i lawm tuk. Roca cu kan pek peng ko hna. Nain special deuh in ‘Dedicate to Thuzar Wint Lwin’s Birthday’ ti hrawnghrang in ṭial chih a hau te men lai cu,” tiah ka ti i cu ti cun phaisa kuatnak account hrawnghrang kan i pe colh.
Thuzar Wint Lwin birthday wish tuah a duhmi nih pehtlaih khawh ka si.
Kei hi volunteer in Thantlang Placement Affairs Committee ah Networking Coordinator rian ka tlaih piak hna.
Cun thaizing October 18 hi Pastor Cung Biak Hum a thih thla khat tlin ni a si.
Amah philhlonak ah tiin Pastor Tluang Zel Thang, Pastor Lian Chawn le Rev. Dr. Duh Sang te he i ceih in “Ring finger Revolution” timi hmanthlak te kan tuah.
Kan facebook profile asiloah kan timeline te ah rak i tar cio in tlang kan au lai kan ti. Hmanthlak kong ah an chungkhar sinah hnatlaknak kan lak cang i lungtlinnak ngeih a si cang.
Hi tlangau nak ah pekchanh a duhmi nih pekchanh khawh asi. Tantakmi an chungkhar caah siseh ralzaam ca zongah Pastor Cung Biak Hum (Biakkolh) philhlonak ah sian tawk pekchanh khawh asi.
