US ram, Michigan state ah sianginn sayama a simi Marisa Fotieo cu Iceland ram lei a zuan cuahmah lio vanlawng chungah COVID-19 a ngeih caah vanlawng zunput chungah an khumherh (quarantine).
December 20 ah Chicago khua in Iceland ram, Reykjavik khua ah vanlawng in tlawn aa thawh. Vanlawng aa cit hlan ah COVID-19 a ngeih/lo aa test i mask zong aa hruk peng. Zawt hmelchunhnak zong zeihmanh a ngei lo.
Nain, vanlawng aa cit tanṭim ah ruah lo piin a hrom fak.
“Mahtein i test nak kai kenmi te cu ka chuah i vanlawng zunput chungah kai kalpi. Second 2 hmanh a rau lo, tungrin 2 bak a um ko (COVID-19 a ngei ti hmelchunhnak),” tiah Sayama Fotieo nih NBC News sinah a chim.
“Vanlawng chungah minung 150 hrawng an um. Ka chawnh hna lai ti ka phang tuk.
“Iceland Air vanlawng chungṭuan (flight attendant = လေယာဉ်မယ်) Ragnhildur Rocky nih aa ka bawmh i nazi 5 chung vanlawng zunput chungah kai khumherh.
“Mah lio hin Iceland ram kan phaknak dingah nazi 5 aa duh rih. Vanlawng chungṭuan nu nih rawl le din awk ti bantuk a taangmi nazi 5 chungah ka herh dingmi paoh aa ka pek dih.
“Pakhatkhat si sual lai tiin atu le tu aa ka veh peng,” ati.
Tuchan ngai cu – vanlawng zunput chung aa khumherh lio ahcun a phone in video aa thlak i TikTok ah a tar cu a hei lar tuk ning hi a mak. “Atlantic Rili cung ka zuan liopi ah COVID ka ngei. Icelandair vanlawng company nih khual lian (VIP) bantukin khumherhnak ṭha tak an ka tuahpiak caah ka lawm,” tiin ca a ṭial chih.
Sayama nu cu Reykjavik khua ah a ṭum cangka in Iceland cozah nih hotel ah ni 7 chung a khumherh – Christmas cu mi ramdang ah amah te lawngin hotel chungah a hmang. Vanṭhat ah, vanlawng chung i a rak zohkhenhtu vanlawng chungṭuan nu nih hotel ah a va len i pangpar, changreu, Christmas thingkung, tbk a va pek.
“Pangpar le Christmas thingkung aa ka pek. Christmas thinkung ah thlai ding mei zong aa ka pek. Ka lung aa ka tongh tuk hringhran, vanmi bak asi ko (a ṭha tuk hringhran ti duhnak),” tiah sayama nu nih a chim.
US ram ah lungmit in COVID-19 zawtnak a karh liopi si
Atu hi US ram cu COVID-19 zawtnak a karh tuk i ngandamnak lei rianṭuan pawl caah cun lungmit bak asi.
December 30 ni 1 chung te lawng bakah mizaw ting 6 dengmang an hmuh hna. Tuni zong mizaw a ting bakin an hmuh hna.
COVID-19 rungrul thar Omicron deuh lawngte in an zaw hna. Raikhamsi voi 3nk (booster) aa chunmi cu mi nih COVID-19 zawtnak an chawnh hna zongah fak tukin an zaw lo ti asi.
US um kan Laimi zong raikhamsi voi 3nk i chun cio hna usih.
