Mexico Ah Vanlawng A Tla Nain A Citmi Minung 103 Hna Cu An Him Dih

Mexico ram Durango State i khuapi chungah minung 103 nih i citmi Aeromexico cu a thaw tlawmpal ah a tla colh nain vantthatnak ah a ho hmanh a thimi an um hraw lo.

Minung 103 chungah minung 79 hna cu hliamhma an tuar. State uktu Jose Rosas Aispuro chimning ahcun hi vanlawng hi a thawh i cung a kai bak ah thli tha a tthawngtukmi nih a pah i engine pahnih a hrawh caah tangah a tlaknak hi a si tiah a chim.

Vanlawng a tlak i mei a kangh hlan ah minung tam deuh cu an zaam manh hna. Hi Aeromexico AM2431 hi Durango khuapi i a ummi Guadalupe Victoria International Airport a thawh tlawmpal zaanlei sang suimilam 6:00 tlukah a tlak hi a si.

Vanlawng mawngtupa pakhat hi faktukin a khawngmi minung pahnih lak ah pakhat a si. A kengruhpi operation tuah hau dirhmun a si, nain a nungdam ding a si ko tiah sibawi te nih an chim. Cun a dang pakhat faktukin a khawng vemi cu mei nih a kanghmi ngakchia nute a si.

A dang minung 97 hna cu sizung ah na kalpi dih hna nain an i khawnnak hma a fah lo caah inn ah an tin kho dih hna. A cung kan kai hlan vawleiri i vanlawng a tlik lio tein thlitha hi a tthawngtuk cang tiah vanlawng ai cit vemi kum 47 a simi pakhat nih a chim.

“Kei cu ka vanttha ngaingai, vanlawng innka a tlongh caah innkapi in ka chuak kho, ka chuah hnu ah midang tah an chuak kho cio hnga ma tiah hnulei ka mer i ka zoh hna. Ruah zong fak ngai in a sur caah meikaang ding zong a thah dih i kan vanttha chinchin” tiah ai tel vemi pakhat nih a chim ve.

Airline Aeromexico hi vanlawng khualtlawnnak himnak lei ah tuanbia dawh a ngei. A hnubik mipi vanlawng tlaknak in an rak thih hi 1981 kum lio i Northern Chihuanhua leiah a kalmi Aeromexico a tlak i minung 32 an thih hi a si tiah vanlawng lei tuanvo ngeitu nih an chim.

Chirhchan: BBC

Be the first to comment

Leave a Reply

Your email address will not be published.


*