Lionel Messi cu kanmah caah chuih dingin minsen a thut cang, tiah France khualipi Paris hrambunh football club PSG nih ESPN thawngla sinah a fehter.
Messi cu June 30 ahkhan Barcelona he an sachoh dih cang caah PSG ah aa ṭhial hi si. ‘Barcelona chuahtak ka siang lo…’ tiin a ṭap len.
Messi cu PSG caah kum 2 chung chuih dingin minsen a thut. A duh ahcun kum 1 peh chap khawh asi te lai. Kum 1 ah bonus telh loin lahkhah $35-41 million hrawng a ei lai.
Messi nih, “PSG ah bawlung chuih lai cu kaa ngaih tuk. Bawlung chuih kongah lungthlitum ka ngeihmi vialte PSG club nih a tlinh dih. PSG zaanglek pawl le nipiah pawl zong an thiam tuk. PSG le an fans caah hlawhtlinnak ngan deuh hmuh dingin ka si khawh chungin kai zuam lai. PSG certual Parc des Princes ah chuih lai lawng kaa ngaih ko,” ati.
PSG nih an fans pawl sinah Messi theihternak (introduction) cu France caan Nithumni chun 11am ah a tuah lai.
Messi le a chungkhar cu nizaan ahkhan pumpak vanlawng in Paris khuapi an phan cang. A ngandamnak zong aa check dih cang i Paris um PSG certual Parc des Princes zong a va zoh.
Messi cu PSG ah a chuih tikah angki number 30 aa hruk lai. Barcelona a rak luhka zongah number 30 aa rak hruk.
Neymar le Messi an chuihṭi ṭhan cang lai
Messi cu Barcelona ah a rak chuihṭi hawi Brazil pa Neymar he PSG ah an chuihṭi ṭhan cang lai. Neymar cu kum 2017 ahkhan PSG nih $270 million in Barcelona sinah a cawkmi si.
Messi aa hung ṭhial cangka in Neymar nih, “Keimah nih kaa hrukmi number 10 hi nangmah nih i hruk,” ati nain Messi nih a duh lo.
Vawlei cung bawlung chuih thiambik laksawng Ballon d’Or voi 6 tiang a ngahmi, tambik ngatu Messi cu kum 13 asi lio tein Spain ram um Barcelona caah a chuih pengmi si. Tutan hi avoi 1nk bik aa ṭhial si.
Nizaan ah PSG he sachoh minsen thut dingin Paris ah a ṭum cu a uartu mibu ngan taktak nih sunglawi tukin an don.
Messi cu Barcelona nih bonus telh loin lahkhah bak lawngah kum 1 ah €70 million a rak pek. PSG ah aa ṭhial hnu cun Barca lio a lahkhah cheu hmanh a hmu ti lai lo.
Kum 34 a simi fa 3 ngei Argentine rammi Messi cu kum 21 chung Barca a um chungah puai 778 a chuih i goal 672 a goal. LaLiga champion voi 10 a lakpi hna. Copa del Rey voi 7 a lakpi hna. UEFA Super Cup le FIFA Club World Cup voi 3 veve a lakpi hna. Champions League voi 4 a lakpi hna.
July thla zong ahkhan a ram Argentine team cu Copa America a lakpi hna.
