15.3 C
Hakha
Thursday, September 23, 2021
- Advertisement -

Ṭial Tharmi

Messi cu ‘Barcelona chuahtak ka siang lo’ tiin a ṭap

Vawlei cung bawlung chuih thiam bik laksawng Ballon d’Or voi 6 (tambik) a ngahmi Lionel Messi cu Barcelona FC in a chuak ding si cang caah mitthli hul har in a ṭap ruangmang.

Messi, kum 34 cu Barcelona club lawngah a chuih pengmi si. Kum 21 chung bak a chuihnak si caah…. nizaan ah media sin thawngthanhnak a tuah i chuahtak a sian lonak kong a chim cu mi fanau pa a ṭap ruangmang ko… a mawh ve hrim lo.

Messi cu PSG ah a lut kho men

Messi nih, “PSG ah ka lut te kho men, nain atutiang ahcun a fiang taktak rih lo. Barca nih ka sachoh tat-ṭan ṭu lo dingin thawng a thanh hnu in club tampi nih an ka fuh cio i atutiang ahcun zei club ah dah ka luhte lai ti kai sungphiat rih lo. Club tampi he kan i ceih cuahmah liopi si.

“Zei bantuk club ah ka va luh hmanh ah Barca he aa phomh te ding club asi lai ti cu a fiang ko.

Vawlei cung bawlung chuihthiam vialte lakah Ballon d’Or tambik (6) ngahmi Messi

“Barca chuahtak cu ka duh hrim lo, nain chuah lo awk ṭha lo. Cun kei cu ka chuih fatin tei peng ka duh. Hihi ka lungput asi. Tei peng ka duh.

“Ka hnu zarh ah Neymar le Angel Di Maria tiin PSG zaanglek pawl he hman kan i thlak caah ‘PSG ah ai ṭhial hnik’ an ka timi kha cu an i capo mi asi.

“Barca ah chuih rih dingin ka tuah khawhmi paoh ka tuah dih ko. Chuahtak ka siang hrim lo.

“Barca cu ka tlaihchan tukmi club asi caah chuahtak ka siang lo i atu bantuk dirhmun ka phak cu ka ngaihchia tuk hringhran. Chuahtak a hau te lai ti hi ka rak ruat bal lo. Zei tik hmanh ah lih ka chim bal lo. Ni kum ahcun chuah ka duh ko, tu kum cu chuah ka duh lo. Mah ruang cun ka ngaihchia tuk.

Ka lahkhah acheu ka zuk ulaw Barca ah ka umter rih ko u

“Barca president Joan Laporta nih Barca club nih tangka leiba kan ngeih caah Messi sachoh tat-ṭan kan ṭu kho lai lo… a timi hi asi kho lomi si. Barca nih leiba a ngeih khawhnak lam um lo. LaLiga caah tangka hman an duh lo i si.

“Barca ah um rih dingin ka si khawh chungin kai zuam nain a sinpi hlei lo. Ka lahkhah acheu in ka zuk ulaw Barca ah ka umter rih ko uh ka ti hna nain Barca nih zeihmanh an ka let duh lo. A lahkhah 30% ṭhumh dingin kan hal nain a duh lo an timi kha an lih lawngte si. Zeihmanh an ka hal lo. LaLiga ah tangka hman an duh lo caah si,” ati.

Messi cu June 30 ahkhan Barca he an sachoh a dih cang.

Messi nih, “Ka lahkhah acheu in ka zuk ulaw Barca ah kum 5 chung ka umter rih ko uh….” ati ko hna nain Barca nih a hmuhmi tangka nakin a zaanglek pawl thlahlawh a pekmi hna hi 110% ding asi caah aa kaih hlei lo. Barca nih kum 2019-20 ahkhan LaLiga caah tangka €600 million lawng a hman. A ra laimi season lebang ahcun €200m lawng hman a timh. Liamcia Messi sachoh ah bonus telh loin lahkhah bak lawngah €70m pek ding ti asi. Cucaah Barca sipuaizi caah aa kaih ti lo.

Messi: Tu kum hi ka caah a har bik

Messi nih social media ah, “Phun dang deuh in chuah thiam si sehlaw ka va duh dah. Barca ah chuih rih dingin ka tuah khawhmi paoh ka tuah ko nain a sinpi kho lo.

“Barca ah kum tampi chung ka chuih ṭimi nan dihlak cungah ka lawm tuk hringhran. Thazaang a kan petu mipi zong nih nan si khawh chungin nan ka dawt caah ka si khawh chungin nan lungtlinter kai rak zuam peng ve. Mah angki caah hin ka sinak dihlak in kai zuam. Ka chuak cang lai, nain hihi a donghnak si lo, hnu ah kan i tong ṭhan hna lai. Barca na chansau ko seh!,” ati.

“El awk um lo, hihi bawlung chuih kaa thokka in atutiang ah ka caah a har bik si. Ka nun chungah harnak phun tampi ka tong ko. Nain tutan cu aa dang tuk. Barca ah bawlung chuih ka cinh ti lai lo, Barca min in certual ah ka chuih ti lai lo, ti ka ruah ah ka celh lo. Ka caah a har bik si.

Messi, a nupi le an fale 3

“Barca ahhin kum 13 ka si lio tein ka chuih cang. Kum 21 hnu ah, Spain ram Barcelona khua in ka nupi le hika ah ṭhangmi ka fale he kan chuak riangmang cang lai. Hika cu kan khua bantukin kan ruah ve cangmi si caah lam dangdang in kan ra ṭhan te lai lo ti cu ka chim kho lo. Ka fale zong kan ra ṭhan te lai tiin bia ka kamh hna,” ati.

LaLiga zong nih social media ah thlahnak ca a ṭial ve, “Hmun khat ah tuanbia kan ṭial ṭi hna. Hika in minthang taktak ah nai chuah caah kan i uang tuk ve. Kan i lawm, Leo Messi,” ati.

Messi nih Barca caah goal 672 a goal. Barca club dirhka in nihin tiangah goal tambik a goal tu si. Sinain, Barca fans pawl cu ‘keimah lo zongin teinak nan hmu peng ko lai’ ati hna.

“Barca cu vawleicung team ṭha bik ah aa tel vemi si. An zaanglek an ṭha tuk hna. Zaanglek thiamthiam zong an ra chap lai, atu lawng si lo, hmailei zongah. Zaanglek cu an ra i an chuak ko. Laporta nih a chim bang, club nakin a biapi deuhmi minung pumpak hohmanh an um lo. A hramthok ahcun phun dangpi lo ko lai, nain nan i ziak te ko lai,” ati.

Messi a thaisung

Messi a thaisung Antonela Roccuzzo nih, “Liamcia kum vialte kong catlang tlawmte in ṭial cu a har ngai! Nan kan dawtnak vialte zeitik hmanh ah kan philh lai lo. An chim lengmang bang, harnak kan tonmi nih a kan ṭhawnter chinchin! Kan chungkhar in kan i hrim lai i, certual ah kan lang ṭhan lai, hmasa nakin kan ṭhawng deuh lai… Kan kalnak paoh ah kan kalṭi hna lai, nain hmailei ah kan kal peng lai !!! Ka dawt, kan dawt tuk @LeoMessi,” ati ve.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -