Mandalay 42 road, Yadanarbon tilawng dirnak le a leng lei ah sandahpiahmi mipi pawl cu ralkap le palek nih meithal in an kah hna.
A tlawmbik minung 6 an i hliam i a thimi pakhat zong a um.
Pakhat pa cu a phei ah meithal in voi 3 an kah caah a phei kek i sibawi te nih an men piak. Sizung ah an kalpi.
Pakhat pa cu a lu ah an kah caah a thluak kek i a nunnak liam colh.
“A lu an kahmi pa cu a thluak keh caah a nunnak liam. Hika hmun an rat pi sin tein ka check i a nunnak um ti lo,” tiah sibawi pa nih a chim.
Thawngla cheukhat nih khaihriat meithal kuan in an kah hna tiah an ttial nain meithal kuan taktak in an kahmi hna a si.
CDM ah aa telmi tilawng rianttuan pawl cu tlaih an timh hna caah tilawng dirnak hmun le a leng lei hmun 2 ah mipi nih sandah an piah.
Mipi pawl nih sandah an piah caah ralkap motor 10, palek motor 10, mitlaihnak motor le ti phormi motor an rak phan i mipi nih lam an kham hna caah atu bantuk in an kah hna hi a si.
Hliam tongmi le a thimi video kan chiah chih nain tuk a sum tuk caah Facebook nih a hlonh.
