Malaysia UNHCR nih tlaihkhih kongah a chimmi

UNHCR

Malaysia Chin ralzaam bu 5 komh Independent Chin Communities (ICC) nih tlaihkhih a tam tuk i cheukhat cu Kawlram ah kuat an tong. Cun, boss te le Malaysia rammi nih nehsawh le tlerhkhonhnak a tamtuk ruangah Chinmi caah ralzaam card thar pek dingin UNHCR sinah a hal.

Malaysia UNHCR lutlai Mr. Thomas: Atu lio ahhin Malaysia ram chung ah zeihmanh a ngei lomi Asylum Seeker le ralzaam tampi an um. Hi kong hi phisin dingah kan i zuam cuahmah.

Cung ruangah, ralzaam thar laknak tuah kan tim. Cucu, tu kum dongh lai hrawngah miphun thleidannak um loin mithar UNHCR card silole UNHCR catlap peknak kan tuah lai i a rak sokmi zong an tampi lai tiah kan zumh.

Tlaihkhih kongah ngaihchia ngai a simi pakhat cu Malaysia cozah lei nih miphun a thleidan ruangah Rohingya pawl cu fawi tein an luat kho. Chinmi lawng siloin miphun dang ralzaam pawl cu tlaihkhih an ton tikah fawi tein an chuak kho lo.

Cu ruangah, UNHCR nih UNHCR card a ngeimi tlaih lo ding le card ngeilo ralzaam pawl cu thleidannak um lo tein thlahpiak hna dingin cozah sinah kan hal.

Malaysia cozah lei in a buai ngai vemi cu nawl ngeitu pakhat sin ah kan hal i a tlamtlin hlan ah a dang mithar nih a tlaih tik ah a thar in i ceih tthan a hau. Zei a si zongah, a fiangmi cu a rauh hlan ah thawngpang ttha pa khatkhat nan theih te ko lai.

Thaizing ah a si hrimhrim lai ka tinak a si lo. Hmailei ah a si te lai. A ruang cu, cozah sin kan halmi hi tlamtlin lei a panh thluahmah. Cozah lutlai tampi zong nih ralzaam hna rianttuannak nawl pek ding le ngandamnak lei ah zohkheh hna dingin an lungtling cang. Cu ruangah, thawngpang ttha cu cuanhcia khawh a si.

Cheukhat camp le thonginn cu an hung ttha thluahmah cang. Nain, lahwahkah rianttuan le palek nih Rohingya silomi cu an thlah duh hna lo. Kanmah lei nih thleidan lo dingin kan chimh lengmang ko hna.

Cheukhat camp le thonginn nih cun tlaihmi an um tikah interview tuah dingin UNHCR sinah thawng an thanh. An hung ttha deuh ngai cang.

A luancia thla ahkhan Malaysia cozah le UNHCR nih Qatar cozah kan ton i Qatar cozah nih Malaysia um ralzaam caah US$50 million ka bawmh lai a ti.

A hramthok ahcun Rohingya ralzaam ca lawngah a ti nain kanmah lei nih miphun thleidan kan duh lo kan ti caah ram hnih hnatlaknak in ralzaam dihlak ca hman dingin lungtlinnak kan ngei.

Bawmhnak tangka cu a ngandam lo i thlopnak tangka a ngei lomi ralzaam hna ca le fim cawnnak ca zongah kan hman lai.

UNHCR nih mithar lak a timh – hmet law rel khawh si

UNHCR nih 2013 card chuh a tongmi kong a chimmi

UNHCR catlap kha card in thlenpiak dingin kan i zuam, MyRC card sok hlah uh