Malaysia: UNHCR card aa tlaihmi Myanmar 3 nih inn an baoh, nazi 350 an fir

Kuala Lumpur — UNHCR card aa tlaihmi Myanmar rammi 3 le Malaysia rammi 1 nih Ampang sang ah inn an baoh. Palek nih an tlaih hna i suimilaam 350 deng an chuh hna.

August 5 zaan 9pm in August 6 deihlan 1am kar ah inn 2 kan luhhnawh i Malaysia pa pakhat le UNHCR card aa tlaihmi Myanmar rammi 3 kan tlaih hna, tiah Ampang palek bawi Yusoff nih a chim.

“Malaysia pa hi an hruaitu asi, Myanmar rammi 1 cu nu asi.

“Mifir 4 kan tlaih hna lio ah, an firmi laptop 22, video thlaknak 5, camera 6, phone 14 le nazi 347 zong kan chuh hna,” tiah media sinah a chim.

“Myanmar nu cu Myanmar pa pakhat i a nupi asi. Thil fir an kalnak paoh ah ‘mi nih kan lunghrinh hna hlah seh’ tiin a zulh peng hna.

“Pa lawngte si hna sehlaw mi nih an lunghrinh ngai hna lai.

“An dihlak in kum 27 in 52 kar an si. Inn hlun deuh an ral i cungcih in an baoh tawn.

“Anmah mifir bu hi kum 2 chung hrawng thil an fir cang. Ampang hrawngah inn 7 paoh an baoh cang,” tiah a chimchap. — The Star

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.