Tlangval Sui Lian Ceu cu tu zaanlei 4:30pm ah COVID-19 raikhamsi aa chun cang.
The Chin Express nih kan chawnh i, “WTCKL ah kai chun. Sibawi pawl nih ‘Malaysia UNHCR minung vialte lakah aa chun hmasa bik na si’ an ka ti,” tiah a chim.
Malaysia ahhin raikhamsi chunhnak hmun tam tuk a um. Amah hlan aa chunmi pawl hi hmun dangah an i chunh caah WTCKL um sibawi nih an thei hna lo i si men lai. Nizaan zongah Chin refugee aa chunmi an um, tiah kan theih nain anmah pumpak kan pehtlai kho rih hna lo. A hngalmi nih comment ah an Facebook mention khawh asi.
“Tuni kai chunhnak ahcun refugee dang ka hmu hna lo.
“Thla 3 hnu ah voi 2nk kan in chunh te lai an ka ti. Atu hi ka ṭin i inn ka phak ka bak si,” ati.
“Voi 1 aa chun cang timi ca an ka pek i ‘voi 2nk i chun dingin na rat tikah mah ca hi i put te. A biapi tukmi si, philh hrimhrim hlah an ka ti.
“May 16 ahkhan raikhamsi i chun ve dingin min ka pek (register ka tuah) i tuni June 24 zaanlei 4:30pm ahhin appointment an ka pek.
“Hnu ah ka hawile zong register ka tuahpiak ve hna i July thla ah appointment an pek ve hna.
“Atu lio i an rammi pawl an chunhmi hna UK sermi AstraZeneca an ka chunh,” tiah a chim.
AstraZeneca cu voi 2 chunh a haumi si.
Sui Lian Ceu hi UNHCR card a ngeimi si. UNHCR catlap a ngeimi zong chunh khawh asi. “Zeihmanh a ngei lomi phungninglo minung zong kan in tlai hna lai lo, ra i chun ko uh” tiin cozah nih a thanh.
Update: June 20 zongah aa chun cangmi Chin refugee an um. A tlawmbik Chin refugee 10 hrawng paoh cu an i chun cang lai tiah zumh asi.
June 20 ah aa chunmi David Ceubawi nih, “Sii chunh kha siiṭhim nganmi an hman an ti nain a fami in an kan chunh i, a chunh koko kha cu siichunh kel tawn ning bantuk khi si ko,” tiah The Chin Express ah chim.
“Kan phak ka ahcun U.N minung kan si caah an khuaruah a har ngai te. Biahal le kherhhlai a tam ngaingai i, Miraang holh asiloah Malay holh tal ṭha deuh tein a thiam lomi caah cun a fawi laloh.
“Anmah nih an kan ti ning ahcun ‘kan i chunh hnu ni 3nak ah “Nalu faak la, na cumpi la, na taksa a fak la. Panadol vai i cawk colh te uh’ tiah an kan ti ning asi. Nain, tuni tiang ahcun kan taksa nih a tei ca zongah a si men lai, kannih cu zei ti ngai in kan um hraw lo hi teh,” ati.
Malaysia cozah nih June 21 ahkhan, “Refugee pawl cu voi 1 lawng chunh a haumi raikhamsi CanSino kan chunh hna lai,” ati.
Nain, CanSino cu China ram ah an cah lio si i a phan rih lo. July thla tanṭim lawngah a phan te lai. CanSino cu refugee lawng si loin an rammi zong an chunh ve ko hna lai.
UN nih, “Malaysia um refugee le asylum-seeker pawl COVID-19 raikhamsi i chun dingin min pe cio cang uh” ati. Mah hi hmet law rel khawh asi.
Malaysia um Chinmi hna caah raikhamsi i chunh hi a biapi tukmi si. COVID-19 pulrai chungin kan luatnak hnga, nan hawile rak kua cio hna ulaw. Share cio usih.
