15.3 C
Hakha
Thursday, September 23, 2021
- Advertisement -

Ṭial Tharmi

Malaysia um refugee chunh ding China ser raikhamsi ‘CanSino’ cu Malaysia rammi zong an chunh ve hna lai

“Voi 1 lawng chunh a haumi China ser raikhamsi ‘CanSino’ cu dur ting 6 le cheu (650,000) in kan kua ve uh tiin rampi cozah kan hal,” tiah Sarawak state Vuancichoh Changtu Datuk Amar Douglas Uggah Embas (hmanthlak chung kehlei 2nak mithman aa benhmi) nih a chim.

“Hmai thla (July) tanṭim ahcun ngah dingin kan i ruahchan,” ati.

“CanSino raikhamsi hi Penan miphun ti bantuk tupi chung khuasami le lam hla khuate innthluan ummi kan minung hna chunh awk ah aa tlak,” ati.

Sarawak state um Penan miphun pawl cu chanthar zapi zaran bantukin khua chungah ummi an si lo. Thilpuan hruk loin (hnah in an chiaṭha lawng an huh) fei le nam put in ramtang tupi chungah ramvaih in khuasami an si. Liamcia kum 20 hrawngin company pawl nih an umnak tupi thingaah caah le ungti cinnak lo caah an ṭhiampiak hna caah cheukhat cu cozah nih innthluan pipi (khaan um lo inn sau pipi) a sak piak hna i cutin hmun 1 ah a umter hna, mah hnu in thilpuan hna an i hruk ve cang. Atang video ah Penan miphun khuasaktintuk ning cu zoh khawh asi.

“Kan si lei rianṭuan pawl nih voi 1 lawng an va tlawn hna lai i an chunh hna lai, tikah rian zong a fawi deuh i tlunkalnak zongah khing a zaan deuh pinah a dihheumi zong a tlawm deuh,” tiah nizaan June 23 ah a chim.

Voi 1 lawng chunh a haumi China ser CanSino raikhamsi le US ser Johnson & Johnson raikhamsi cu Malaysia ah hman dingin cozah nih June 15 ah a cohlan ve cang hna.

Sarawak state vuancichoh changtu nih, “Kan si lei rianṭuan pawl nih naite ahkhan Miri le Kapit peng tupi chung ummi le khuate mi cheukhat cu Sinovac raikhamsi chunh dingin an va tlawn ko hna.

“Nain, hika hmun pawl ah pulrai a chuah caah a rannak in raikhamsi chunh an hauh caah rian rang deuh in lim khawhmi CanSino tu chunh zokzok kan timh hna nak asi,” ati.

“Atutiang ahhin kan state pumpi ah minung ting 9 fai (910,595) cu voi 2 siloah voi 1 paoh raikhamsi kan chunh cang hna,” tiah a chimchap. Chunh cangmi pawl cu US ser Pfizer, UK ser Astrazeneca le China ser Sinovac an chunh hna. Voi 2 chunh haumi lawngte an si.

Atutiang ah Malaysia cozah nih an ram ah hman dingin raikhamsi phun 5 a cohlan cang hna. Mah pawl cu:

  1. Pfizer-BioNTech (US le Germany ser)
  2. AstraZeneca (UK ser)
  3. Sinovac (China ser)
  4. CanSino (China ser) le
  5. Johnson & Johnson (US ser) hi an si.

Mah vialte hi Malaysia cozah nih a cawk cio cang hna nain hmasa 3 lawng hi Malaysia ram an phan rih, i mah phun 3 lawng hi an chunh cuahmah hna lio asi. Mah phun 3 hi cu voi 2 chunh a haumi lawngte an si.

4nk CanSino le 5nk Johnson & Johnson hi cu voi 1 lawng chunh a haumi an si. CanSino cu hmai thla tanṭim ah Malaysia a phan lai. Johnson & Johnson hi cu zeitik a phak lai ti hngalh asi rih lo.

Malaysia cozah nih, “Ahohmanh nih raikhamsi i thim khawh asi lo. A ummi paoh kan in chunh ko hna lai,” tiin May 30 ah thawng a thanh cang.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -