Malaysia um Myanmar ngakchia unau 2 nih hnawmpung an thlok i hmuhmi rawl an ei caah an thi. Kedah state, Langkawi peng, Kampung Baru Sungai Tepa ah ummi an si.

Unau 2; Nizambudin Jamaludin, kum 4 le Ngei, kum 2 cu February 13 ahkhan an innpa inn ah an thi.

Langkawi peng palik bawizik Ashari nih, “Zaanlei 6:15pm ah phone a kan chawnh i a hmun ah rianrang in kan kal colh,” tiah a chim.

“Hringtu pa nih a fale 2 cu hnawmpung an thlok lio ah a hmuh hna i an innpa inn ah a kalpi hna. Minutes tlawmpal hnu ah an thaw an chuah ti lo. Khuami pakhat nih palik a kan chawnh,” ati.

“Unau hna hi hnawmpung chungah an hmuhmi rawl an ei tiin kan zumh.

“Sii lei rianṭuan pawl nih an thihmi an fehter. An ruak cu Sizung ah an kuat hna.

“Unau hna hi inn an ngei lo i mah khuate ahhin innpa he an um.

“Hringtu pa cu tilawng remh in aa hlawhfa mi asi,” tiah a chimchap.

Hringtu pa, kum 36 cu a thaizing February 14 ah palik nih an tlaih.

1. Fale daihthlanh case
2. Phungninglo in Malaysia luh case le
3. Ritsi hman case in an tlaih. Sibawi nih an check i ritsi a hmang, an ti.

Unau hna min hi Rohingya min asi. Malaysia media nih cun ‘Myanmar rammi’ ti lawng an chim.