Wednesday, December 1, 2021

Malaysia um Chinmi i ralrin ding

Atu lio cu Covid-19 ruangah rian ngeilo in fir le mihlen in a vakmi an tampi.

Naite Nikhatni ahkhan pa 2 nih thil kuatu bantuk in an i umter i kum 30 nu damiah an tteih. Minu cu inn ah a fapa bawhte (thla 3) le kum 3 a fanu he lawng an um lio a si.

Penang state i Jalan Van Praagh ah a ummi kum 30 nu cu pa 2 nih thil kuatmi pek kan in duh innka rak kan onh an ti.

Northeast district palek bawichang Soffian Santong nih, “Nikhatni zingka sml 10:30am hrawng ah pa 2 nih innka an kingh i thil kuatnak company rianttuanmi kan si. Thil pek kan in duh an ti.

“Minu nih innka a onh hna le cangka in pakhat nih au hlah tiin namte in a hmuah colh.

“Cun, a hngawng ah aa oihmi suitthi RM1,200 man a lak. Cun, RM50,000 in rak kan pe an ti i minu nih mah zat tangka cu kan ngei lo a ti hna.

“A dang pa pakhat nih a fapa bawhte cu a lak i a ka ah tape in a phih hnu ah um chung ah a chiah.

“Pa 2 nih an duhmi tangka cu an ngah lo caah an zaam. Kum 3 a fanu te cu a him ko,” tiah a chim.

Pa 2 nih damiah an tteih hna lio ahhin minu a vapa cu rianttuannak hmun ah a um lio a si.

Atu hi palek nih tlaih dingin pa 2 cu an kawl hna lio a si. – The Star

Cucaah, Malaysia um Chinmi zong kan i ralrin ngai a hau. Nan innka hmai ah nan hngalh lomi minung nih cu company cun kan si i innchungah rak kan luhter an in ti hna ahcun innka onh hrimhrim hna hlah uh.

- Advertisement -