Malaysia Tilian Ruangah Zahan Zaan cu Hriphi khuami khuaci an mui

- Advertisement -

Hriphi khuami umnak Malaysia khualipi Kuala Lumpur i Jalan Ipoh sang cu zahan zaan muika in khuadei lai 4am tiang dong loin tilian nih a khuh hna caah khuaci an mui.

Zaanṭim 2am hrawng ah tilian cu hngawng tiang le tung phum ngacha in an tan i tilian nih a phak lonak khuami inn lei ah an fale an zaampi hna.

Tangka RM10,000 man hrawng tilian nih a hrawhpiak hna.

Tu zingka 6am ah mei a mit chap hoi i atu mah ca kan ṭial lio 2:50pm tiangah a ra rih lo.

Malaysia tilian

Hriphi khuami inn 13 (chungkhar 30 hrawng) le Hriphi biakinn tilian nih a khuh dih hna.

Mah kong he pehtlai in The Chin Express nih kan pehtlaih hna i Hriphi khuami Pu Daniel nih atanglei bangin thil sining a kan chimh.

“Zaan muika in deilei 4am tiang dong loin tilian a kai peng. Hmasa 11pm tiang ahcun khuami inn 2 le Hriphi biakinn lawng tilian nih a khuh hna. Khuami mino vialte kan chuak dih i tilian nih a khuhmi inn 2 le biakinn cu thilri ṭhial kan va bawmh hna.

Malaysia Hriphi biakinn ceiling tiang dengmang in tilian nih a phum i thilri tamtuk an rawk sung

“Inn pakhat cu an thilri hi biakinn ah kan ṭhialpiak hna. Mah lio cun biakinn coka cu khuk tiangin tilian nih a khuh ve ko nain kan i pumhnak zawn cu kemit tiang lawng ti a phan. Cucaah tam a kai chap ti theng lai lo tiin cabuai tampi kan pehtawnh hna i cabuai cungah biakinn thilri he pumpak thilri he kan chiah.

“Nain 1am ahcun kemit tiang lawng simi kha thin tiang dengmang bak a hung phan i biakinn chung cabuai vialte zong a khuh dih ding si caah thil cu zaanṭim le khuamang ruahpi sur le tilian lakah tilian nih a phak lonak hmun dang um khuami inn (lan-htaih lei) ah kan va ṭhial ṭhan.

Mah hi 12am tiangah tilian nih Hriphi biakinn a khuhmi si. Deilei 4am ahcun mah vialte hi tilian nih a phum dih i cauk, textbook le computer, tbk thilri tampi an rawk sung dih

“1am hrawngah inn ka ṭin cu kan inn zong tilian nih khuk tiang bakin a rak khuh ve cang. Kan inn hi dot 2 si caah inn tang thil vialte cu cungdot ah kan ṭhial dih hna. Kan fale le cu ruahpi sur lakah tilian cu hngawng tiang le tung phum ngacha in kan tan i tilian nih a phak lonak khuami inn ah ka va ṭhial/thiar hna.

“Tilian cu dong loin a kai chin lengmang i 2am ahcun khuami inn dihlak ngawt (inn 13 le biakinn) a khuh dih cang. Inn 13 minung chungkhar 30 hrawng cu 2am hrawngah zaanṭim ruahpi sur lakah tilian cu tung phum ngacha in kan tan hna i kan fale he tilian phak lonak khuami inn pawl ah kan va zaam hna.

“Cozah nih pakhat hmanh a kan bawm lo. Kanmah tein tilian phak lonak khuami inn ah kan va zaam cio. Tu chun balte ah cozah maw an si NGO dek an ra i tilian nih a khuhmi inn le min cazin an kan lak, thil a rawkmi cazin an kan hal. Khohsuai kio (megge koreng) an kan put. Mah cu cozah kan ti hnga maw nih an kan bawmhmi cu si. Tilian kao hnu lawngah an ra chuak.

“Biakinn hi kan fale cacawnnak sianginn caah kan hmanmi asi. A man fak deuhmi piano, mixer, tbk biakinn seh pawl cu tilian a tlun cangka in inn dangah kan va ṭhial hna i an him ko.

“Nain biakinn computer 5 (tangka cun RM7,000 hrawng si lai) an rawk dih.

Malaysia rammi pawl zong tilian lakah hitin an zaam ve hna

“Cun, kan fale cacawnnak cauk, marker pen, textbook, tbk. vialte an rawk dih. Tilian hi zaanṭim khuadei lai ah a zual caah thil ṭhialkam a har tuk i a rawkmi tam khun. Kan fale cauk le textbook a rawkmi dihlak hi RM3,000 hrawng man cu asi ve lai.

“Pu Van Biak Thawng te inn zong cu thil ṭhial kan bawmh ko hna nain ṭhial har deuh a simi bizu pawl cu a rawkmi an tam ngai.

“Tu zingka 6am hrawngah bomb bantukin a puakmi thawng thangpi kan theih. Mah cangka in mei a mit i atutiang ra rih lo hi.

“Tilian cu 6am hrawngin zor aa thok i atu cu a kao dih cang. Tuni cu khuami vialte kanmah le inn cio kan thianh hna i atu 2pm hi kan inn kan thiah dih bak si. Midang zong an inn cio an thianh hna i an buaithlak taktak lio asi ve.

Malaysia sang dang zong tilian nih fak piin a khuh cio hna

“Pu Hei Mang te inn lebang cu ceiling tiang dengmang bakin tilian nih a khuh caah hnawmtam, nawncek le vawlei torlecheng inn chungah a lut dih i tuni chunnitlak an rau ko lai.

“Atu cu kanmah inn cio kan thianh lio si kaw biakinn cu kan thianh kho rih lo. Atu tlawmpal ah khuami vialte biakin thianh kan i thawh ṭhan lai. Khuaci kan mui ko hih.

“Mei zong cu ra hlah kaw, pangka zong um lo i kan inn pawl cu an ro kho lo. Zei tiang dek a rauhte lai.

Klang hrawng zong fak tukin tilian nih a khuh

“Tuni le thaizing cu inn thianh le thil ṭhialmi lak ṭhan ah kan buai lai pinah, Titiwangsa pawng vialte zong tilian nih fak tukin a khuh i a rawkmi tamtuk. Inn pawng thingkung tlu le lam rawkmi zong a tamtuk caah thaizing hi rian a ṭuan kho lomi zong kan um pah len te lai,” ati.

Tilian nih a khuhmi Hriphi khuami inn pawl cu;

  1. Pu Hei Mang te inn
  2. Pu Van Biak Thawng
  3. Pu Cung Or
  4. Pu Thang Ling
  5. Pu Bawi Thang
  6. Pu Biak Hnin Thang
  7. Pu Sai Lian Thang
  8. Pu Daniel
  9. Pu Peng Thang
  10. Pu Van Lal Cung
  11. Pu Hei Lian
  12. Pu Sui Lian Thang
  13. Pu William Bawi Uk Thang
  14. Hriphi Biakinn

Malaysia cu inn 1 ah chungkhar 2 lole 3 um asi caah tilian nih a khuhmi inn 13 ahhin chungkhar 30 hrawng (minung 100 hrawng) an um.

Atanglei bik number 10 inn 13 tiang hi luti khor le tlanglawng lam pinlei ah a ummi an si. Annih cu tunai te lawngah an inn chung ti a zor. Atu hi inn an thianh liopi asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...