Malaysia tilian ruangah Chinmi inn le Chin biakinn ah thil ṭhial hau tiang in ti a lut i Hriphi khuami cheukhat cu midang inn ah an zaam.
Nizaan chun hnu in tuni atutiang dong loin ruahpi a sur peng caah Kuala Lumpur khua, Jalan Ipoh sang ah tilian a tlung i inn cheukhat ah khuk tiang le tai tiang bakin ti a lut.
Jalan Ipoh cu Hriphi khuami umnak asi. The Chin Express nih kan pehtlaih hna i atanglei bantukin thil sining an kan chimh.
Hriphi Chairman Pu Bawi Bik Thawng nih, “Kan khua biakinn le khuami inn 2 ah ti a lut i thil kan ṭhial hna. Kan biakinn coka cu khuk tiang bakin ti kan tan,” tiah a chim.
“Thil cu mi inn ah kan ṭhialmi zong um. Biakinn chungah cabuai kan chiah i cabuai cungah biakinn thil he pumpak thilri he kan chiahmi zong um.
“Tu zaan ihnak ngei lomi hi inn 2 (chungkhar 5 hrawng – Malaysia cu inn 1 ah chungkhar pahnih pathum um si) an si. Ti a luh lonak khuami inn ah an riak lai. Zei tiang dah an an inn an chuahtak lai ti cu kan chim kho rih lo, nikhua nawl asi te ko lai. Atu cu ruahpi zong a sur peng rih i tilian a kai chin lengmang,” ati.
Pu Hei Mang nih, “Kan inn cu tai tiang dengmang bakin ti a kai i inn chung thilri vialte mi inn (Mang Tin Sang pa te inn) ah kan ṭhial dih,” tiah a chim.
“Kan inn thil kan ṭhial dih in biakinn thil kan ṭhial i atu 10:30pm hi mi inn ah kan i dinh bak asi. Kan inn cu kan chuahtak chung. Tu zaan cu mi inn ah kan riak lai. Zei tiang dek mi inn ah kan riahte lai.
“Atutiang hi ruahpi a han rih lo i ti a kai chin lengmang. Kan thil kan ṭhialnak Mang Tin Sang pa te inn hram tiang ti a phan cang i tu zaan khuadei tiang a sur ahcun an inn chung a lut ve kho men.
“An inn mileng khan khat in buaithlak tak in thil kan chiah i a luh ve ahcun midang inn ah ṭhial ṭhan a hau lai i kan buaithlak ngai lai.
“Hriphi biakinn cu kan i pumhnak tiang ti a phan deuh lo. A kamlei balte cu a khuh dih cang. Cucaah biakinn thilri pawl cu biakinn chung ah cabuai tampi kan pehtonh i mah cung ahcun kan ṭhial hna.
“Ti cu a kai chin lengmang i zei tik dek a zor te lai. A zor dih hnu ah inn vialte ṭawl dih le thil ṭhial ṭhan dih a hau lai i atu ning te cun hmai zarh chung cu rian zong ṭuan khawh dawh kan si lo. Kan buai ngai lai.
“Jalan Ipoh i luti khor lawngkang kha a liam dih i ek haang le nawncek haang pawl sikaw a rim chia tuk i atu thil kan ṭhialmi nakin a kao hnu inn thianh lai hi kan ngaihlah deuh.
“Jalan Ipoh khua chung lampi kha tai tiang bakin kan tan. Ṭihnung tuk. Zaan khuadei a sur cun kan inn cu ceiling tiang ti nih a khuh dih ko lai.
“Cun, ti a lut vemi Laimi inn pakhat cu Pu Van Biak Thawng te inn asi. Ramdangmi inn zong cu ti an lut ve len ko hna,” ati.
