Malaysia: Thaizing thokin state dang kal a ngah cang

Tuni ah Malaysia ram hruaitu PM Ismail Sabri Yaakob nih,” Thaizing October 11 thokin state dang kal kan on cang, nain raikhamsi voi 2 aa chun cangmi ca lawngah asi,” tiah TV in thawngthanh.

Malaysia cu kumtling 90% leng raikhamsi tling tein an chunh cang hna caah atu bantukin state dang kal an on hi si.

“Raikhamsi voi 2 aa chun cangmi Malaysia rammi cu ramdang khualtlawn zong a ngah cang,” ati.

‘Voi 2 aa chun cangmi’ ti tikah voi 2nak nai chunh ni 14 a tlin hnu lawngah ‘voi 2 tling tein aa chun cang’ tiin cohlan asi. Voi 2nak nai chunh ni 14 tlin lo ahcun ngah rih lo.

PM nih, “Ni fatin COVID-19 zawtnak ngei hmuhmi zei tluk an karh zongah, state dang kal kan phit ti lai lo. Zawtnak a umnak hmun te lawng chawhvah kan khap (EMCO tuah) lai,” ati.

“Dawr le rian vialte ṭuan khawh dih asi peng cang lai. Kan mipi dihlak ngawt raikhamsi kan chunh cang ko hna caah zawtnak lakah kan tlongleng chih cang lai. Zawtnak karh aikun, a karhnak sang te lawng kan phih lai. Peng ningpi le state ningpi in phih a um ti lai lo.

“A taktak ti ahcun, zulhphung kan tuahmi hi felfai tein nan zulh cio ahcun sang khat hmanh phih a hau ti lai lo.

“State dang kalnak lam cheukhat ahcun palik nih lam an kham lai i raikhamsi voi 2 ning tein aa chun cangmi nan si/lo an check pah lengmang lai. Nain atu lio bantukin hmun kenkip ah lam kham le mi check cu a um ti lai lo. An zuam si cun an duh caan paoh ah an check ko lai, nain cozah nih hmun kenkip ah mi check ter kha a um ti lai lo.

Ramri balte kan phih rih

“Tuni tiang ahcun ramdang luhchuahnak ramri kutka le airport cu kan phih rih ko hna. Ngandamnak Vuanci Zung nih thil sining hoih in bia a chah te lai. Pathian/Allah nih a rem ati ahcun, a rauh hlan ah on/lo thawng kan thanh colh ve lai.

“Ramdang zong nih an rammi tam deuh cu raikhamsi tling tein an chunh ve cang ko hna caah, tuan ah on khawh asi te ko men lai.

“Nain, Hluttaw Niam meṭing ah ka rak chim cang bang khan, ramdangmi khualtlawng pawl kan ram luhter hna nak ding ahcun thil 6 zoh chih an hau,” ati.

PM nih October 7 ah, “Ramdang khualtlawng pawl kan ram luhnak nawl kan pek hna hlan ah thil 6 zoh/ruah a hau,” tiah Hluttaw Niam meṭing ah a rak chim. Mah 6 cu;

  1. Liamcia ni 14 chung an ram COVID-19 zawtnak ngei milu
  2. An ram milu nuai 1 chungah zeizat dah zawtnak an ngei timi nuaituak/zatuak
  3. An milu nuai 1 chungah zeizat dah an thi
  4. A thimi dihlak
  5. A dammi milu le
  6. Zawtnak ngeimi dihlak cazin, an si.
Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...