Malaysia rampumpi May 12 in June 7 tiang lockdown (MCO) dih asi lai

- Advertisement -

Malaysia ram cu COVID-19 pulrai nih khoh 3nak a den caah May 12 in June 7 tiang rampumpi ah chawhvah khap (MCO) dih asi lai, tiah ram hruaitu Prime Minister Pu Muhyiddin Yassin nih tuni ah a thanh.

A ra laimi muslim “Rawl Ulh Donghnak Puai (Hari Raya Aidi Filtri)” ah mi inn lenkai le thlan zoh zong a ngah lai lo, ati.

Kan sang le veng ah COVID-19 a karh tukmi hi fak deuh in kham kan duh caah si, ati.

“Hmunhma hme ah minung naih nawn in um le mibu in um nih hin COVID-19 zawtnak a karhter bik ti cu atu lio mizaw cazin le science nih fiang tein a langhter.

“Leng ah chuah vah fak piin kan kham i kan dihlak in inn ah kan um cio lawngah COVID-19 i chawnhnak cikcin hi kan chah khawh lai,” ati.

MCO chung ahcun; ṭhitum puai, pumh, meeting, civui, rawl hrawm, tbk mibu in tuahmi vialte khap dih asi. Sianginn vialte zong an khar dih hna lai.

Rawldawr ah ei a ngah lo, i-kalpi (bungus or takeaway) lawng ngah. Mawṭaw mongtu telh in minung 3 lawng cit a ngah.

“MCO chungah zei bantuk rian (chawlehnak) paoh ṭuan kan onh dih ko.

“Nain, rianngeitu (boss) te nih nan rianṭuan cheuthum cheukhat lawng zung nan kai ter hna lai. A taangmi cheu hnih cu zungkai ti loin an inn in internet in a langpar in nan ṭuanter hna lai,” ati.

Peng dang le state dang kal, zaanglek (lentecelhnak), zatlang puai le sianginn, tbk vialte cu tuni in khap dih an si cang. Adang paoh cu May 12 in khap an si lai.

Atu hi Malaysia ah ni fatin COVID-19 mizaw thar 3,000 leng peng an hmuh hna. Zawtnak aa thokka in atutiang mizaw hmuhmi dihlak ting 4 le cheu dengmang (444,484) an si cang. Mah chungah 1,700 an thi cang.

Ni kum March thla ahkhan avoi khatnak bik rampumpi lockdown (MCO) an tuah i an ram sipuaizi (rian) vialte an khar dih caah ni fatin tangka RM2.4 billion peng an sung.

Lockdown cu duhsah tein an dorh thluahmah i sipuaizi pawl cu an pehzulh ter ṭhan hna (rianṭuan an onh ṭhan hna). Mizaw an tamnak sang tete cu palik le ralkap nih an kulh i lengchuah an rak onh hna lo.

Tu kum thokka ah, zawtnak a karh tuk ṭhan caah Sarawak state dah ti lo cu rampumpi in lockdown (MCO) an tuah ṭhan.

Kan hnu zarh ah, voi 3nak lockdown (MCO 3.0) tiin rampumpi ah peng-ṭhen cheukhat le peng tampi an lockdown ṭhan hna. Chinmi tampi kan umnak Kuala Lumpur le Selangor state peng 6 zong an lockdown hna.

Ram hruaitu Pu Muhyiddin nih, “Khoh 3nak COVID-19 hi sikan ngei tein doh hna usih. A herh tuk lo ahcun inn ah um peng uh,” ati.

“COVID-19 nih khoh 1nk le khoh 2nk a kan den lio kha cu tampi kan zorter khawh ko.

“Nain, atu kan tonmi khoh 3nak hi cu hmasa nakin a zual deuh i a fak deuh ti hi nan dihlak theihter kan duh hna. Kan tei kho rih lo,” ati.

Tutan hi Malaysia rampumpi ah voi 3nak MCO an tuah si caah MCO 3.0 ti zongin an auh.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...