Malaysia cu COVID-19 zawtnak a karh tuk caah hmai zarh June 1 in 14 tiang zarh 2 chung ni kum bantuk ‘zeizong vialte phih dih (full lockdown)’ an tuah lai.
Nizaan kha mizaw 8,290 bak an hmuh hna. Tuni lebang cu 9,020 an hmuh hna.
Ram hruaitu Rampumpi Vuancichoh Zung nih, “Lockdown chung cu zei rian taktak hmanh ṭuan a ngah lai lo, khar awk a ṭha bak lomi nunnak caah a herhmi lawng on/ṭuan khawh si lai,” tiah a thanh.
“Ni 1 ah mizaw 8,000 leng kan hmuh hna caah le atu hi sizung ah COVID-19 mizaw 70,000 leng an um cang caah full lockdown tuah dingin bia kan khiah hi si,” ati.
Lockdown cu dot 3 (3-phase) in an tuah lai
Dot 1nak lockdown cu June 1 in 14 tiang asi lai, sauh/lo aa fiang rih lo. Mah chung cu zei rian taktak hmanh ṭuan a ngah lai lo. Nunnak caah a herhmi khar awk a ṭha bak lomi lawng ṭuan a ngah lai. Mah pawl cu hnu ah cozah nih a thanhte lai.
Mah chung hi Malaysia um Chinmi rian kan ṭuan khawh lai lo caah, tangka kan ngei lai lo i inn hlan man pek awk le rawl cawknak kan harsa tuk hna lai. June 14 pinlei tiang an sauh lebang ahcun kan harsa taktak lai.
Lockdown chung zulhphung cu ni kum full lockdown tuah lio i zulhphung he khan aa khat dih ko lai.
Dot 2nk lockdown
Dot 1nk lockdown chungah mizaw an zor deuh ahcun, Dot 2nak lockdown ahcun minung tampi i but hau lomi sipuaizi/rian cheukhat cu ṭuannak nawl pek an si lai. Dot 2nak lockdown cu zarh 4 chung asi lai.
Dot 3nk lockdown
Dot 2nk lockdown a dih hnu ah, dot 3nk lockdown asi ṭhan lai. Mah tik cun, zatlang cawlcanghnak (pumh, meeting, puai, tbk) zeihmanh onh asi rih lai lo nain, sipuaizi/rian vialte ṭuan khawh ṭhan dih asi cang lai. Amahbelte, zung kaimi le rianṭuannak hmun ah kalmi milu rikhiah asi te lai. Dot 3nk lockdown cu atu lio MCO bantuk hi si te lai.
Lockdown dot 1 hnu dot 1 i ṭhial caan cu ni fatin mizaw tlawmtam zoh in bia khiah asi lai – dot 1nak lockdown hi June 14 tiang lawng asi khawh bantukin mah pin zong asi kho.
Lockdown ruangah rianṭuan kho lo ding ‘Malaysia rammi’ pawl cu cozah (Tangka Vuanci Zung or Finance Ministry) nih tangka a bawmh hna lai.
