Zahan zaan 10pm ah Malaysia ralkap vanlawng a tla i ralkap 1 a thi. Malaysia ram, Penang state i Butterworth khua um vanlawng ralkap sakhan i vanlawng tliknak lam ah a tlak hi si.
A tlami cu Malaysia Vanlawng Ralkap (Royal Malaysian Air Force) vanlawng Hawk 108 (hmanthlak) asi.
Malaysia Ralkap/Runvennak Vuanci Datuk Seri Hussein nih, “Mah thawngpang ka theih cu ka ngaihchia tuk hringhran. A tlaknak aruang ṭha tein kan hlat lai,” tiah a chim.
Hawk 108 vanlawng cu a mongtu telh in minung 2 cit khawhmi ral tuknak vanlawng mongh cawnnak caah hmanmi asi.
“Tantakmi chungkhar nan ngaihchiatnak kan tuarpi hna. A nunnak liammi le hliam tongmi ralkap 2 chungkhar cu Ralkap Vuanci Zung nih a herhmi paoh kan in bawmh hna lai.
“A tlaknak aruang felfai tein kan hlat lai i thawngpang thar um cangka in kan thanh colh lai.
“Mah kongah, mipi nih tette um loin bia chokvai nan tuahnak hnga lo kan nawl hna,” tiah Ralkap Vuanci nih a chim.
