[ Malaysia ] Pudu Thirhri Hling Kulh (lockdown) cu Tlaihkhihnak Um Lo Tein Aa Lim

-

- Rak Cawngia -

Hopoh nih kan thinphanmi le kan lungretheih ciomi Pudu thirhri hling kulh (lockdown) cu tlaihkhihnak um lo tein May 29 zaan suimilam 9 ah aa lim, thirhri hling kulhmi an phoih ruangmang cang.

A chung ah ummi cu chim lo a leng ummi zong hnangamnak in kan khat cio.

Pudu sangah Covid-19 mizaw 40 hrawng an um caah karh hlah seh tiin Malaysia Ralkap nih May 14 zaan in thirhri hling in an kulh i hohmanh lengchuak loin meithal he an congh (lockdown). Chinmi pumpak le chungkhar 400 (milu 1,000 hrawng) zong hi thirhri hling kulh chungah lungrethei le thinphang in an um.

“Tlaihkhihnak um lo tein aa lim i thirhri hling an phoih cu kan i lawm tuk hna. Chun ahkhan a kan congtu ralkap le palek umnak buk pawl cu an phoih cang. Thirhri hling kulh cu zaan 9pm ah an phoih. Kan thawpi kan chuah khawh cang. Kan i lawm tuk,” tiah Pudu lockdown ah aa tap vemi Chinmi pakhat nih The Chin Express ah a chim.

Hmasa ah PJ le Seleyang zong lockdown an rak tuah i a chung ummi vialte palek nih an check hna i phungninglo ramdangmi paoh an tlaih hna caah Pudu zong tlaihkhihnak an tuah ve lai tiah Chinmi vialte thinphang in kan um.

Pudu ahhin UNHCR card/catlap ngei lo Chinmi 100 hrawng an um. Tlaihkhihnak an tuah lai ti an phan tuk caah minung 40 hrawng cu luti khor (miawng) chungin an zaam.

Pudu um Chinmi 3 cu Covid-19 lunghrinh case in May 17 ah cozah nih sizung ah a kalpi hna. Anmah he inn khat ah ummi Chinmi 40 hrawng zong cozah nih a lak hna i hmun dang Sungei Besi ah a chiah (quarantine) hna. Ni 14 an tlin cun dam tein an rak chuak ṭhan lai tiah zumhnak kan ngei.

Sizung kalpimi Chinmi 2 cu dam tein an ṭin cang. Tuni ah Pudu um kum 1 Chin ngakchia pakhat cu Covid-19 lunghrinh case in sizung ah an kalpi. A nulepa cu an dam ko. Thlacam bawm cio hna usih.

Kuala Lumpur Palek Bawi Datuk Seri Mazlan Lazim nih, “tuni ah Kuala Lumpur Poipang Tolrelnak Meeting kan tuah i Ngandamnak Vuanci Zung nih ruahnak a kan cheuh hnu ah lockdown donghter dingin hnatlaknak kan ngei,” tiah a chim.

“Lockdown cu a dong cang nain Pudu cu palek le Ngandamnak Vuanci Zung nih kan zohfel peng rih lai,” ati.

Zawtnak a thiang kho rih lo. June 9 tiang cu A Herh Lomi Lengchuah Khap (Conditional Movement Control Order or CMCO) a si rih. Zapi lengchuah khawh asi rih lo.

Hi Pudu lockdown (thirhri hling kulh) chung ummi kan Chin miphun hna caah bawmchantu vialte le thlacam piaktu miphun hawi nan dihlak cung ah kan i lawm. Malaysia kan dirhmun cu a feh khawh rih lo caah kan umnak cio ah i ralrin peng kan hau rih, tiah Chin Refugee Committee (CRC) nih a thanh.

Ṭial Tharmi

Kanpetlet ah sibawi le nurse pawl Mobile Tablet an phawt hna

Chin state, Kanpetlet khua sizung ah ngandamnak lei rianttuan pawl Mobile Tablet an pek hna. Mobile Tablet peknak cu...

Tuni Malaysia ah Covid-19 mizaw 5 hmuhchap a si

Tunu July 6 ah Malaysia ram ah Covid-19 zawtnak ngeimi 5 an hmuhchap hna. 3 cu ramdang in a rung tlungmi an...

India ram in tlun duhmi Chinmi 190 hrawng an um

India ram in Kawlram tlun a duhmi Chinmi 190 hrawng an um i atu tiang ah minung 7 lawng an tlung kho...

Thawngpang thatuk: Chin state ah Covid-19 mizaw an um ti lo

Chin state, Hakha sizung ah aa thlopmi kum 23, Covid-19 mizaw pa (Case 232) cu a pum ah voi 2 tiang zawtnak...
- Advertisement -