Kan theih cio cang bantuk in Covid-19 mizaw tampi an hmuhnak Pudu sang cu Malaysia cozah nih lock down a tuah i nizaan he tuni he mi cheukhat cu bu in an kalpi hna.

Bus in kalpimi pawl cu tlaih dingin kalpimi siloin Quarantine chiah dingin an kalpimi hna a si tiah Alliance of Chin Refugees nih a thanh.

Pudu area chungah aa tapmi hna nih theih a herh ngami cu sibawi te nih Covid-19 zawtnak an test i zawtnak a ngeimi pa khatkhat an hmuh ahcun an kalpi lai.

Covid-19 zawtnak ngeimi pakhat an hmuh ahcun amah lawng siloin inn khat ah a um ttimi dihlak cu Malaysia Ngandamnak Vuanci Zung nih a timhtuanmi hmun ah Quarantine chiah an si lai.

Malaysia Ngandamnak Vuanci Zung nih atu hi Pudu sang chungah aa tapmi cheukhat pawl cu bus in a lak hna i tlaihkhihmi an si lo ti kha mipi nih kan theih a herh.

Covid-19 zawtnak ngeimi an hmuh ruangah a herh ningin Quarantine chiah dingin an kalpimi hna a si. An kalpi mi pawl cu Ngandamnak Vuanci Zung nih a timhtuahmi hmun ah an chiah hna lai i ngandamnak le dinei awk caah lungretheih ding a um lo. Anmah nih an tawlrel piak dih hna lai.

Pudu sang lockdown nak hmun ahhin Bangla lawng siloin Chinmi zong Quarantine chiah dingin kalpimi an um. Pudu sang ah a ummi le an chungkhat pawl nih an lungretheih tuk caah Chin Ralzaam Bu sinah phone an chawnh hna i an tlaih hna tiin thawng an thanh.

An tlaihmi hna si loin Quarantine chiah dingin an kalpimi hna tu a si.

Chin Ralzaam Bu hruaitu pawl zong nih lockdown nak hmun ah aa tapmi Chin miphun caah rian an ttuan cuahmah lio a si. Lockdown nak hmun ah aa tapmi pawl cu kan miphun nih kan in philh hna lo.

Lockdown nak hmun ah aa tapmi hna zong nih nanmah le nan chungkhar ngandamnak ah biatak tein nan i ralrin a herh. Covid-19 zawtnak a karhnak hnga lo nawl ngeitu nih nawl an chuahmi zulh a herh. – ACR

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.