Malaysia ram hruaitu Prime Minister Pu Muhyiddin Yassin cu inn ah lengchuak loin ni 14 chung i erh (home-quarantine) asi ve cang.

Nithumni ah cozah meeting an tuah lio ah a kai vemi pakhat Covid-19 zawtnak a ngeih caah PM telh in meeting a kaimi vialte tuni May 22 thokin inn ah ni 14 chung lengchuak loin i erh (home-quarantine) dih dingin order an pek hna.

Prime Minister cu aa test ve nain zawtnak a ngei lo, tiah Prime Minister Office nih tuni ah cathanh a chuah.

“Prime Minister Office ah meeting tuah fatin khat le khat aa hlat piin ṭhut le ngandamnak vuanci zung nih nawl a chuahpi zulhphung vialte zulh dih peng asi,” ati.

Vuanci dang pawl tah Nithumni meeting ahcun an kai ve maw ti balte hngalh asi lo.

Malaysia cozah nih Covid-19 zawtnak karh hlah seh tiin March 18 thok in lengchuah a khap i May thla thokka ah tlawmpal a dorh, i rianṭuan zong a on cang nain sianginn cu a khar rih. Minung tampi i pumh le state dang tlawn tbk., zong a ong rih lo.

Tuni ah Covid-19 zawtnak ngei thar 78 an hmuh hna i hmuhmi dihlak 7,137 an si cang. Tuni ah mizaw pakhat a thi i a thimi dihlak 115 an si cang.

Thong tampi an dam cang caah sizung ah zohkhenh liomi mizaw 1,163 lawng an um lio asi.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...