Malaysia ram hruaitu PM Pu Ismail Sabri Yaakob nih, “Tu hnu ni tlawmpal ah state-dang kal kan on cang lai. Rampumpi ah state khat le khat i tlawn khawh dih asi lai,” tiah a chim.
Peng dang (inter-district) kal cu a ngahnak sau pah cang. KL-Selangor-Putrajaya kal a ngah. Taxi/Grab ah minung 2 cit a ngahnak zong sau pah cang.
Tu hnu ni tlawmpal ahcun, state tam deuh nih an mipi kumtling 90% cu raikhamsi an chunh dih cang hna lai.
PM Pu Yaakob nih, “State dang kal onnak kong cu a rauh hlan ah thawng ka thanh colh ko lai… a rau lai lo. Ni 1, 2 silole 3 hnu hrawngah thawng ka thanhte lai. A rau lai lo,” tiah nizaan ah a chim.
Hmasa zongah, kan rammi kumtling 90% raikhamsi kan chunh khawh hna cun state dang kal kan on lai, tiin PM nih a rak chim cang.
Nizaan tihni tiangah, Malaysia rampumpi kumtling (kum 18 le cunglei) 89.1% cu raikhamsi voi 2 cio an chunh cang hna.
Pahang, Kedah, Perak, Kelantan le Sabah state balte hi an khul nuar ngai. Nizaan tihni tiang ah an mipi kumtling raikhamsi an chunhmi hna hi 80% an tling rih lo. Sabah hoi hna cu 63.7% lawng an chunh rih hna.
