Shah Alam, Malaysia — Phungninglo ramdangmi cheukhat cu tlaih luat duh ah a phunphun in an thiamnak an chuah i an i titer len, aa hngilhtermi hna an um, nain Selangor state Lahwahkah nih aa zumh naisai lo.
State lahwahkah nih Ningani zaan ah suimilaam 7 chung bak phungninglo ramdangmi tlaihkhihnak a tuah i nu 20 le pa 68 a tlaih hna.
State lahwahkah bawi Mohd Shukri Nawi nih, “phungninglo ramdangmi pawl cu Myanmar, Bangladesh, Indonesia, Nepal, India le Vietnam rammi an si,” tiah a chim.
An tlaihmi hna cu thla 8 bawhte in kum 60 kar an si hna. Kal thiamka ngakchia 3 zong an i tel; nu 2 le pa 1 an si.
Nawi nih, “inn saknak hmun 2 ah tlaihkhihnak cu kan tuah i ramdangmi 320 kan check hna hnu ah phungninglo 88 kan tlaih hna hi si.
“Phungninglo rianttuan pawl cu tlaih luat duh ah namchan in an i hngilhter len. Cheukhat cu inn kil le tungpang ah an i thup.
“Cheukhat cu thil cawinak seh crane cung hna ah an kai. Nain tlaih luat dingin an i zuam lenmi cu an awngmin lo.
“Lockup ah kan hren hna i ni 14 chung an konglam tam deuh kan hlat hnu ah tazacuai an si te lai. Kan tlaihmi hna hi passport le work permit a ngei lomi pawl an si.
“Phungninglo ramdangmi pawl rian a petu Malaysia boss pawl zong an konglam kan hlat hna lai i tehte tling kan hmuh khawh ahcun taza kan cuai ve hna lai.
“Tlaihkhihnak cu Lahwahkah rianṭuan 90 nih Ningani zaan 11pm in kan thok i, suimilaam 7 hnu Zarhteni zingka 6am ah kan baan (ngol).
“Malaysia hmatpungṭin deu aa tlaihmi hna um ai kun tiin, Selangor state hmatpungṭin zung rianṭuan 5 nih a kan telpi,” tiah a chim.
