Malaysia palek nih sui a firtu 5 an thah hna

Malaysia palek nih sui a firtu 5 an thah hna

KUALA LUMPUR: Zahan zaanlei 4:30pm ahkhan minung 5 nih suidawr i sui an fir caah palek nih tlaih dingin an rat hnawh hna, nain mifir nih meithal in an kah hna caah palek nih an kah ve hna. Mifir 5 cu palek nih thi lakin an kah hna.

Suidawr cu Jalan Kuchai Lama i supermarket chungah a ummi si. Mifir 4 cu supermarket kutka hram ah thi lakin an kah hna. 5nk pa cu Mercedes Benz motor ttha takin a zaam lio ah thi lakin an kah ve.

Palek pakhat cu mifir nih a ke ah an kah ve. A kuan hma he sizung ah an kalpi i atu cu a dam deuh ngai cang.

Supermarket chung bakah i kap hna kaw dawr mileng a zaza cu nunnak kawl in an i thup dih. Nain, minung pakhat nih an i kah lio video tawite cu a phone in a thlak khawh.

Kuala Lumpur palek bawizik Mazlan nih, “suidawr cu Kuala Lumpur khualipi chungah a ummi si ko nain, Selangor state palek sakhan he aa naih bik,” a ti.

“Dawr thil fir kong phone a kan chawnh cangka in lam nai bikah a ummi Selangor palek pawl kan kuat hna.”

“Palek le mifir cu supermarket kutka hram bakah an i tong. Mifir 2 nih pistol an i put. Palek cu an kah hna.”

“Palek cu anmah i ven a hauh ve cang ruangah an kah ve hna, mifir 4 cu an thah hna. Mifir 4 cu supermarket lengah Mercedes Benz motor chungin an hawipa pakhat nih a rak hngah hna, motor in a zaam.”

“Palek nih an dawi colh. 400m hrawng an dawi hnu ah thi lakin an kah ve. An firmi sui vialte cu kan chuh khawh dih hna. Pistol 2 zong kan chuh hna. Hreitlung, namtong, Mercedes Benz motor le Perodua Myvi motor zong kan chuh hna,” tiah a hmun i thawngla pawl sinah a chim.

“Mifir 5 an min le liamcia an tuanbia kong cu kan hlat lio si,” a ti.

Selangor state Misual Hlatnak Zung (CID) lutlai Fadzil Ahmat nih, “a ke ah an kahmi palek pa cu thlop dingin University Malaya Medical Centre ah kan kuat,” a ti.

Suidawr pawngah dawr dang a ngei vemi pa Hong nih, “suidawr an den lio ah video thlak dingin a thli tein suidawr lei ah ka va kal,” a ti.

“Nain, ruah lo piin suidawr a lenglei thlalang a kuai caah ka lau tuk i ka zaam tthan.”

“Motorcycle luchin aa chinhmi pa 3 cu suidawr chungah an rak um. Pistol aa putmi 1 nih suidawr lengin a ven hna.”

“Ka dawr lei ah ka zaam cangka in, meithal puah thawng voi 20 hrawng ka theih. Ka thi sual hnga maw tiah lungrethei in ka um cang.”

“Ka khuk a ther thluahmah. Tlawmpal ah, mifir pawl cu thi lakin an kah hna tiah ka hawile nih an chim,” a ti.

Thil sining a hmutu adang pakhat Lee nih, “mifir pawl cu an dihlak in palek thuam bantuk a simi liangbah hring an i hruk dih,” tiah a chim.

“Hreitlung, namtong le meithal 2 an i put. Pa 3 suidawr chung an luh lio ka hmuh. Lo diam ka tli colh,” a ti.