Malaysia palek nih pehzulh in mi inn a baohtu mifir phu an kawl hna

Malaysia palek nih pehzulh in mi inn a baohtu mifir phu an kawl hna

Atu hi Malaysia palek nih pehzulh in Klang peng chung i inn pawl ah damiah tteih hmang misual phu tlaih dingin an kawl hna lio a si.

Mifir 7 cu Honda CRV motor in an vak i ni 2 chungah inn 3 damiah an tteih cang.

Mifir phu nih hin zaan tlai hnu le deilei deuh ah damiah an tteih hna ti a si. An i citmi motor cu Bestari Jaya ah an firmi a si lai tiah palek nih an zumh.

“A hramthok ah hmaihuh aa huhmi pa 4 cu zaan sml 11 ah namtong he Taman Pendamar Indah 2 ah a ummi Pos Malaysia branch manager nu (kum 50) inn ah an lut.”

“Suitthi 1, kutdonghrolh 3, sui hnaton 1, handphone 3, motor tawh 2 le tangka tlawmpal an lak. A zate an firmi man hi RM10,000 hrawng a si,” tiah South Klang district palek bawi chang Shamsul Amar Ramli nih a chim.

“Deilei sml 3 hrawng ah hmaihuh aa huh i namtong aa putmi mifir 5 nih cun Taman Sentosa Jaya ah a ummi lorry mong pa (kum 28) inn an boah tthan.”

“Suitthi 1, sui kutdonghrolh 2, sui banhrolh 1 le handphone 1 an fir. A zate an firmi hi RM8,000 hrawng man a si.”

“Mah hnu ah, Taman Klang Jaya ah a ummi inn pakhat boah an timh tthan. Kum 59 tarpa nih ih aa timh ah a innleng in thawngpang a theih. Leng ah a chuak i a va zoh ahcun hmaihuh aa khuhmi pa 3 nih gate boah an timh lio a hmuh hna. Rianrang in dahmei aa lak i a ceuh hna, mah ahcun mifir cu an zaam colh,” tiah Shamsul nih a chim.

Atu hi mifir phu cu palek nih an kawl hna lio a si. Cun, mi inn boah thawngpang nan theih ahcun pengkulh palek headquarters ah thawngthanh dingin palek nih thawng an thanh. – NST

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.