Malaysia palek nih miruak pakhat an hmuh, Nora Quoirin a si lai tiah an zumh

Malaysia palek nih miruak pakhat an hmuh, Nora Quoirin a si lai tiah an zumh

Seremban: Dusun resort in 2.5km a hlatnak hmun ah nu ruak pakhat an hmuh i a tlaumi Nora Anne Quoirin (Ireland rammi) a si lai tiah palek nih an zumh.

“Kanmah nih cun Nora ruak a si lai tiah kan zumh ko. Nain, a chungkhar kan fehter hmasa rih lai. Ruak cu pumhlainak tuah dingin Seremban sizung ah an kalpi,” tiah palek bawi Datuk Mazlan Mansor nih a chim.

“Ruak cu thilpuan loin an hmuh. Nain, tlaihhrem a si/lo chim ding ahcun a tuan tuk rih. Pum hlainak an tuah dih hnu ah a thih ning cu a fiang te lai.”

“Nora a chungkhar he kan i tong cang i an fanu a si/lo fehter dingin sizung ah an kal lai,” tiah a chimchap.

“Tuni zaanlei sml 1.57pm ah nu ruak pakhat kan hmuh,” tiah Negri Sembilan palek bawi Datuk Mohamad Mat Yusop nih a chim.

Nora Anne Quoirin te chungkhar cu Malaysia ah zarh 2 caam dingin an rak tlawn hi a si i, August 4 ahkhan Nora cu a tlau. Malaysia nawl ngeitu nih Nora an kawl ni 10 nak ah ruak an hmuh hi a si.

Nora (kum 15) cu unau chuak 3 lak ah fa upabik a si.

August 12 ah Nora a nu Meabh Quoirin nih “Kan fanu kong a theimi le a hmumi cu laksawng ah RM50,000 kan in pek hna lai” tiah thawng a thanh. _ NST