Johor, Malaysia — Myanmar ram in a rami Rohingya pa pahnih; Mohd Rofik Mohd Zakaria, 29 le Mohd Ali Husin Chitmiya, 30 cu Malaysia pa an thah tiin tuni ah Kluang Pengkulh Biaceihzung ah taza an cuai hna.
Malaysia pa R. Raja Chandra, 54 cu October 14 zaan 8pm hrawng ah Yap Tau Sah khuate i Jalan Merbau lamkam inn pakhat pawngah an thah.
Namtong le vainam hmang in an thah, tiah biaceihzung catlap chungah hmuh khawh asi.
Thah a tongmi pa ruak cu ruak checktu nih an check dih rih lo caah November 20 ah biaceihzung ah an kong ceih tthan te dingin biaceihtu nih nithla a tuk.
Mohd Ali Husin cu taza an cuainak case Malay holh in an relpiakmi aa fian lo caah November 20 ahcun Rohingya holhlet an hlan piak te lai.
Taza an cuai hna nak upadi hi biaceihzung nih ‘an buar ko’ tiin a khiah ahcun thah an si ve lai. Mi a thatmi cu thah ve hrimhrim ding timi upadi asi. — Bernama
