Malaysia ram hruaitu Rampumpi Vuancichoh Pu Muhyiddin Yassin (hmanthlak) nih, “A ra laimi October thla ahcun kan ram um kum 18 cung vialte (rammi he ramdangmi he) COVID-19 raikhamsi tling tein (voi 2 cio) chunh dih hna dingin cozah nih kan i tinh,” tiah a chim.
“COVID-19 hrik hi aci aa thleng i hmasa nakin chawnh le thih a fawi deuh caah a ran khawh chungin khamnak sii i chunh dih kan hau. Ni 1 ah minung ting 5 (500,000) peng kan chunh cang hna lai.
“Raikhamsi chunh hi COVID-19 teinak caah tawhfung asi. Hmasa kan simanking ning ahcun, hmai kum March thla tiangah kum tling 80% lawng raikhamsi tling tein chunh ding kan ti.
“Hnu ah, December thla hlan hrimhrim ah chunh dih hna ding kan ti. Nain atu cu zawtnak a karh tuk caah kan ranh ṭhan hi asi.
“Cun, Selangor le Kuala Lumpur um kum 18 cung vialte cu August 1 hlan ah raikhamsi voi 1 cio tal chunh dih hna dingin kan i tinh.
“State dang vialte zong August thla dongh ahcun an state mipi kum tling acheu leng raikhamsi an chunh dih hna lai. September thla dongh ahcun 70% an chunh dih hna lai.
“Atutiang ahhin raikhamsi 76.1 million kan cah cang. 70% cu Pfizer raikhamsi asi i a taangmi cu Sinovac, AstraZeneca le CanSino an si.
“Kan cahmi chungah 20 million cu a phan cang.
“Tu thla dongh hlan ah 10 million a phan chap lai. August thla ah 10 million a phan chap lai. September ah 13 million a phan chap lai. October ah 5 million a phan chap lai. Mah tik cun a phanmi dihlak 58 million asi cang lai. A taangmi pawl cu November le hmai kum January kar ah an phan dih lai,” ati.
Malaysia rammi cu 33 million hrawng lawng an si. Kum 18 cung cu 22 million hrawng lawng an si. October thla tiangah raikhamsi 58 million a phak tak ahcun kum tling cu (rammi he ramdangmi he) voi 2 cio an chunh khawh tuk hna lai tinak asi.
Malaysia cu liamcia ni 3 chung COVID-19 mizaw thong 10 leng peng an hmuh hna. Nizaan zong thong 11 dengmang an hmuh hna.
