Nihnihni ahkhan Malaysia lahwahkah nih Klang khua ah phungninglo ramdangmi tlaihkhihnak a tuah i 177 an tlaih hna. Mah chungah, UNHCR le MyRC card deu aa tlaihmi zong an um.
UNHCR le MyRC card deu cu puaisa sinah RM200 in an cawk tiah lahwahkah nih a ti.
“Klang khua um inn 149 le apartment 253 ah mi checknak kan tuah i ramdangmi 177 nih lahwahkah upadi a phunphun an buar caah kan tlaih hna,” tiah Malaysia lahwahkah bawizik Datuk Khairul Dzaimee Daud nih a chim.
“Kan tlaihmi hna hi kum 20 in kum 50 kar Pakistan, Indonesia, Myanmar (minung 28), India, Nepal, Cambodia le Sri Lanka ram in a rami an si hna.”
“Cheukhat cu Malaysia ram ah phungninglo in a rak lutmi an si. Cheukhat cu an passport thih hnu tiang a ummi an si. Lahwahkah Upadi 1959/63, 1963 le Passport Upadi in tazacuai an si lai,” tiah Khairul nih a chim.
Tlaihmi phungninglo ramdangmi pawl cu Bukit Jalil Lahwahkah thonginn ah an kalpi hna.
Tu kum January 1 thok in Ocotober 23 tiang ah Malaysia cozah nih a ramchung hmun 14,582 ah phungninglo ramdangmi tlaihkhihnak a tuah, ramdangmi 170,800 a check hna i phungninglo ramdangmi 43,476 a tlaih cang hna.
Cun, Lahwahkah upadi a buarmi Malaysia rammi cheukhat zong a tlaih hna. Phungninglo minung rian petu (boss) 1,086 zong a tlaih chih hna.
Malaysia lahwahkah nih ramdangmi a tlaihmi lakah Bangladesh rammi an tambik. 14,629 an si. Pahnihnak ah Myanmar nih a zulh, minung 4,559 an si. Philippines (3,445) le a tangmi cu ram dangdang in an si hna. – Bernama
