Malaysia cozah nih tu kum January thla thok in October 3 tiang ram pumpi ah phungninglo ramdangmi 40,175 a tlaih cang hna.
“Tu kum January 1 in October 3 tiang ram pumpi ah phungninglo ramdangmi tlaihkhihnak voi 13,589 kan tuah.”
“Tlaihkhihnak kan tuah lio ah ramdangmi 159,372 kan check hna. Cu chungah phungning loin a ummi ramdangmi 40,175 le rian petu boss 992 kan tlaih hna,” tiah Malaysia Lahwahkah bawizik Khairul Dzaimee Daud nih tuni ah a chim.
“Tu kum chung atu tiangah phungninglo ramdangmi 45,498 cu an ram ah kan kuat cang hna. Atu hi an ram ah kuat dingin timh tuah lio mi, lahwahkah camp ah a ummi 9,349 an um. Mah chungah 7,352 cu pa an si. 1,752 hi nu an si i, ngakchia 245 an si,” tiah Khairul nih a chimchap.
Malaysia Lahwahkah nih phungninglo ramdangmi hna an ram tlun khawhnak Back for Good (B4G) program cu August 1, 2019 in a thok i atu tiang a sokmi hi ramdangmi 49,472 an si cang.
“August 1 in October 3 tiang B4G program a sokmi 49,472 an si. A tambik cu Indonesia, Bangladesh, India, Pakistan le Myanmar an si.”
“Kan ram ah phungninglo in a um an ummi nan rammi pawl kuat kan bawm uh tiin ramdang tanzung pawl kan ton tthan hna lai,” tiah Khairul nih a chim fawn.
Tuan ahkhan Malaysia Ramchung Vuanci Tan Sri Muhyiddin Yassin nih “phungninglo ramdangmi zorternak caah B4G program kan tuah i August 1 in December 31 tiang tuah a si lai. A hlan bantuk in nithla sauh a um ti lai lo” a rak ti.
