Malaysia nih Kawlrammi telhin ramdangmi 127 a tlaih hna

Malaysia nih Kawlrammi telhin ramdangmi 127 a tlaih hna

October 2, 2019 ah Malaysia lahwahkah le palek nih Shah Alam khuapi ah a ummi sehzung pawl ah tlaihkhihnak an tuah i Kawlrammi telhin ramdangmi 127 an tlaih hna.

Tlaihkhihnak an tuah lio ahhin phungninglo ramdangmi pawl cu rian an ttuannak zunput ceiling cung hna ah an i thup. Thil chiahnak khan hna ah an i thup nain an tlaih tthiamtthiam hna.

Tlaihkhihnak cu zaanlei sml 4:30 in zaan sml 8:30 tiang an tuah. Bangladesh, Indonesia, Myanmar, Nepal, India le Pakistan ram in nu le pa 127 an tlaih hna.

“Kan tlaihmi hna cu Bangladesh rammi 7, Myanmar rammi pa 1 le nu 7, Nepa rammi 2, India pa 15 le nu 1, Pakistan pakhat an tlaih hna. Kum 20 in kum 45 kar an si hna,” tiah Selangor lahwahkah bawizik Mohamad Shukri Nawi nih a chim.

“Shah Alam khuapi chung um sehzung 3 cu lahwahkah le palek nih an luhhnawh i ramdangmi 180 an check hna hnu Lahwahkah Upadi buarmi 127 an tlaih hna hi a si. National Registration Department rianttuan zong nih an zulh hna.”

“Cun, Mykad (Malaysia hmetpungtin) deu aa tlaihmi Indonesia nu 2 zong kan tlaih chih hna. Cun, phungninglo ramdangmi rian a petu boss zong tlaih dingin kan i zuam fawn.”

“Rianttuannak hmun ah tlaihmi pawl cu Selangor lahwahkah zung ah an kalpi hna. Cun, Mykad deu aa tlaihmi Indonesia nu 2 cu Selangor Hmetpungtin zung ah tam deuh kherhlai dingin an kalpi ve hna,” tiah Shukri Nawi nih a chimchap.

Tlaihmi pawl cu Lahwahkah Upadi in taza an cuai hna lai i Lahwahkah thonginn ah an kuat hna lai.

Tuni zong Malaysia cozah nih hmun kip ah tlaihkhihnak a tuah. Malaysia um Chinmi zong rianttuan, umkalnak ah ralrin i zuam hna usih.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.