Nizaan ahkhan Malaysia lahwahkah le palek i bawm in Selangor state ah a ummi sehzung pakhat ah tlaihkhihnak an tuah i Kawlrammi 11 telhin ramdangmi 99 an tlaih hna.
Tlaihkhihnak cu zinglei sml 10 in zaan sml 7 tiang an tuah i Bangladesh, Myanmar, Nepal le India rammi an tlaih hna.
Ramdangmi an tlaihmi pawl cu zeihmanh a ngei lomi, passport nithla a thih hnu tiang a ummi an si hna.
“Tlaihkhihnak cu Damansara le Klang ah kan tuah. Kum 20 in kum 40 kar simi Bangladesh (51), Myanmar (11), Nepal (3) le India (34) kan tlaih hna,” tiah Selangor Lahwahkah bawi Mohamad Shukri Nawi nih a chim.
“Kan tlaihmi paw cu Selangor lahwahkah thonginn ah kan kal pi hna i ni 14 chung hren an si lai. Phungninglo ramdangmi pawl rian a petu boss zong kherhlai lio a si i tehte kan hmuh ahcun tazacuai a si ve lai” tiah Shukri Nawi nih a chimchap.
Cun, nizaan tthiamtthiam ah Malaysia nawl ngeitu nih Port Dickson i hmun tampi ah phungninglo ramdangmi tlaihkhihnak a tuah i Kawlrammi 4 telhin ramdangmi 19 a tlaih hna.
Port Dickson i an tlaihmi pawl cu kum 20 in kum 41 kar Indonesia (10), Myanmar (4), Bangladesh (3) le Vietnam (2) an si. An dihlak in Lenggeng camp ah an kuat hna.
