Malaysia nih a rammi 2 thattu Myanmar pa thah ve dingin tazacuai

Malaysia nih a rammi 2 thattu Myanmar pa thah ve dingin tazacuai

Penang state: Kum 28 Myanmar pa Sai Min nih George Town khua i Argyll Lam kam ah Malaysia rammi 2 a thah hna caah tuni ah biaceih zungah taza an cuai.

Sai Min cu Biaceihtu L. Umma Devi hmai ah taza an cuai. Sai Min nih nawlnak bia kaa khat hmanh a chim lo.

Tazacuaitu cozah sihni (DPP) Nurul Fatin Hussain nih Sai Min cu taza a cuai. Taza a cuai lio ah Sai Min cu aiawhtu sihni a ngei lo.

Tazacuainak catlap ah aa ttial ning ahcun, Sai Min nih Malaysia rammi Sarbudeen Shikander, kum 72 le Senni Jalaludeen, kum 48 hna cu Jalan Argyll lamkam i an umnak inn dot 1nk ah, zaanlei 4:30pm in 5:30pm kar ah namte in a sawh thah hna, ti a si.

Lainawng Upadi Dal 302 (lai a nawngmi paoh cu thih dantatnak pek si ve seh) in tazacuai a si caah biaceihzung nih ‘a sual ko’ tiin bia a khiah ahcun duh/lo zongah thah ve ding a si.

Tazacuainak ca an relpiak lio ah, ding tein alu a suk. Kaa khat hmanh a holh lo.

Biaceihtu Umma Devi nih, “October 9 ah biaceihzung ah na kong ceih a si lai, khi tikah na ngandamnak kong sibawi report zong rak ap” tiah nithla a tuk.

Malaysia rammi 2 hna cu August 25 zaanlei ah thah an tong. A hmun ah palek an phanh tikah thi aa neh dihmi Myanmar pa Sai Min cu an hmuh i an tlaih – ka HMET law relchap

Sai Min he inn a hlang ttimi Myanmar pa zong an tlaih ve nain, anih cu tazacuai a tong lo. — NST, The Star

Leave a Reply

Your email address will not be published. Required fields are marked *