Malaysia: Johor state ah Myanmar pa pakhat thah a tong i May 8 ah palek nih lunghrinhmi ramdangmi 13 cu Taman Senai Jaya ah an tlaih hna.

Kulai khua palek bawi Tok Beng Yeow nih, “Nirukni zingka deihlan 5.40am hrawng ah Taman Senai Jaya i Jalan Senai Jaya 2 ah miruak kan hmuh tiin mipi nih phone a kan chawnh.

“Palek cu a hmun ah an va kal i lam cungah mipa ruak cu an hmuh.

“Cu lio ahcun, mipa a pum cungah ID an hmu lo. Nain, a hmun ahcun namte an hmuh.

“A ruak an zoh i mipa cu a hngawng hnulei, a liang keh le orh, a orhlei ttang le a paw ah nam in an sawh,” tiah a chim.

“A thimi pa cu Myanmar rammi a si i kum 30 hrawng a si.

“Thil sining kan hlat i palek nih lunghrinhmi Myanmar rammi 3, India rammi 10 kan tlaih hna. Kum 22 in kum 50 kar an si. Thilri tampi zong kan tlaih chih.

“Bia kan hal hna i a thimi pa telhin an dihlak in zuu an ding tti hna. An din khawh in an i si,” tiah palek bawi Tok nih a chimchap.

Atu hi palek nih tlaihmi minung 13 cu sakhan ah May 14 tiang hren dingin Kulai biaceihzung ah ca an ap lio si.

An tlaihmi hna pawl cu Lainawng Upadi Dal 302 in taza an cuai hna. Biaceihzung nih an sual tiah bia a chah ahcun thah (thihdan pek) an si lai. – NST