Malaysia ah COVID-19 zawtnak a karh tuk caah ram hruaitu Prime Minister hruainak in tuni ah meeting an tuah i atu lio lockdown (MCO 3.0) cu rengh deuh dingin bia an chah, tiah Prime Minister Zung nih tunai ah a thanh.
Zeitin dah kan rengh deuh lai timi thil sining tling cu thaizing May 22 ah Runvennak/Ralkap Vuanci Datuk Seri Ismail Sabri Yaakob nih a thanh te lai, ati.
Hmasa ahcun, ‘Prime Minister nih tuni ah TV (live) in full lockdown kong thawng a thanh lai’ tiin biachokvai a leng nain a thanh lo.
“Atu lio MCO 3.0 ahhin state-dang le peng-dang kal zong kan khap i pumh, mibu um le zatlang puai, zaanglek, meeting, civui, ti bantuk zong kan khap ko nain chawnh a fawi deuhmi COVID-19 ci thar ruangah kan sang le khua ah zawtnak a karh tuk ṭhiam.
“Mah ruangah, zawtnak karh kham khawhnak ding ahcun fak deuh in sipuaizi (rianṭuan) le chawhvah khap a hau tiah vuanci zungkip lutlai vialte an lungtling dih,” tiah Prime Minister Office (PMO) nih a thanh.
Nithumni thokin nihin tiang a pehpeh in ni 3 chung bak mizaw 6,000 leng peng an hmuh hna caah ‘ni kum March lio bantukin ho taktak hmanh rianṭuan ngah loin full lockdown an tuah hnga maw….’ tiah mipi thinphan cio asi.
Atu lio MCO 3.0 ahcun rianṭuan an onh. MCO 3.0 cu May 12 in an thok cang i June 7 ah a dong ding si. Zeitin dah an rengh deuh (ni kum March thla lio full lockdown bantuk asi maw) timi cu thaizing ah thawng an thanh tikah kan ṭial ve te lai.
