Thaizing kiptuh Nihihni (May 25) thok cun Malaysia rampumpi kungṭeih le dawr vialte ah thil cawk aa thawhmi pawl suimilam 2 chung lawng um ngah cang lai, tiah cozah nih tuni ah a thanh.
Ramchung Chawlehnak Vuanci Datuk Seri Alexander Nanta Linggi nih, “Kungṭeih le dawr ah thil cawk aa thawhmi pawl cu May 25 thok cun suimilaam an zoh hau cang lai, a sau bik suimilaam 2 chungah dawr in an chuah ṭhan hau cang lai,” tiah a chim.
“Kungṭeih le dawr vialte nih rikhiah in mileng nan luhter fawn hna lai. Pe 13 (4 sq m) hlat in nan umter hna lai.
“Kungṭeih le dawr vialte cu 8am in 8pm tiang lawng nan on hna lai. Sii dawr (pharmacy) le kutke tin sensi thuh/ṭamhnnak dawr, spa, ngandamnak dawr, ti bantuk pawl cu 8am in 10pm tiang nan on hna lai.
“Kungṭeih le dawr vialte nih nan rianṭuan acheu fai (60%) lawng nan ṭuanter hna lai. A taangmi 40% cu nan ṭuanter hna lai lo.
“Zawtnak hmuhnak kungṭeih le dawr vialte cu a rannak ni 3 chung khar le rungrul thahnak sii kah dih asi lai.
“May 25 thokin COVID-19 zulhphung (SOP) chapmi tling cu Ramchung Chawlehnak Vuanci Zung website kpdnhep.gov.my ah zoh khawh asi i MCO kong a tlangpi cu Ram Himnak Zung (National Security Council – NSC) website mkn.gov.my ah zoh khawh asi.
“Mipi nih zulhphung felfai tein an zulhnak hnga, zohfeltu dingah Ramchung Chawlehnak Vuanci Zung nih minung 2,262 cu rampumpi ah kan thlah hna lai. Kungṭeih, dawr, sehzung le restaurant, ti bantuk vialte an zohfel dih lai.
“Zulhphung a zul lomi cu Chawnhfawi Zawtnak Khamnak le I Vennak Upadi 1988 ningin fak piin dantat an si lai pinah, tangka zong liamter an si lai.
“Cun, zulhphung a zul lomi dawr pawl cu a rannak in khar dingin Ramchung Chawlehnak Vuanci Zung nih Ram Himnak Zung (NSC) sinah nawl kan hal lai.
“Rianrang tein COVID-19 zawtnak a zornak hnga le kan ram sipuaizi a dam colhnak hnga, dawr ngei vialte nih zulhphung zulh khawh cio i zuam uh.
“Ahopaoh nih zulhphung zulh cio hi a biapi tuk hringhran. Mah lawngah COVID-19 karh hi kan zorter khawh lai i kan ram sipuaizi a dam kho lai,” ati.
