Malaysia: Klang Valley pengkomh chung um sizung tampi ah COVID-19 mizaw zual ihkhun a lawng ti lo tiah Ngandamnak Vuanci Zung nih a thanh.
Ngandamnak Vaunci Zung director-general Tan Sri Dr Noor Hisham Abdullah nih, “Kan ramchung sizung dang pawl zongah COVID-19 mizaw zual ihkhun 70% an hman dih cang.
“COVID-19 mizaw zual (Stage 4 le 5) pawl thlopnak caah hmunhma kan kawl lio a si.
“Cucaah, sizung pawl cu mizaw zual zohkhenhnak ihkhun tam deuh chia uh tiin ca kan kuat hna,” tiah a chim.
Atu hrawng cu nifatin Malaysia ah Covid-19 mizaw thar a thongthong in an hmuh hna.
Dr Noor Hisham nih, “Mipi nih Covid-19 zulhphung ttha tein an zulh lo ahcun May thla dih hrawng ahcun nifatin Covid-19 mizaw thar 5,000 peng an phan kho,” tiah a chim.
Nizaan May 9 ah Malaysia ah Covid-19 zawtnak ngeimi 3,733 an hmuhchap hna. Zawtnak ngei hmuhmi dihlak 440,677 an si cang.
Selangor in mizaw thar tambik hmuh a si, 1,278 an si.
Cun, May 9 ah Covid-19 in a dam i sizung in chuah termi 3,211 an si. Zawtnak aa thokka in a dammi dihlak 401,934 an si cang.
Liamcia sml 24 chungah Covid-19 in a thimi 26 an si. A thimi dihlak 1,683 an si cang. – The Star
