Kuala Lumpur: Malaysia Ralkap Bawizik nih, “Klang Valley ah COVID-19 zawtnak a karh tuk caah Wangsa Maju um ralkap sizung ‘Hospital Angkatan Tentera Tuanku Mizan’ vawleitang dot i mawṭaw chiahnak (carpark) cu mizaw thlopnak caah ihkhun 50 kan chiah cang,” tiah a chim.
Sizung kalmi pawl nih an mawṭaw an chiahnak sizung tang vawleitang dot kha an thianh dih i COVID-19 mizaw thlopnak caah ihkhun 50 an chiah.
Ralkap sizung asi bang, an rak sak lio hrimhrim ah ‘chemical le biological poipang a chuahte sual ah sizung tang hi hman awk ṭha seh’ tiin an rak sakmi asi. Sizung sawhsawh vawleitang carpark bantuk asi lo.
One of Malaysia’s military hospitals in KL has activated its car park into disaster ward as #COVID19 pandemic continues unabated. Hospital Angkatan Tentera Tengku Mizan parking area designed for emergency used is equipped with oxygen, suction and power plug at each column-vidnet pic.twitter.com/uzyXaVxiG5
— Kuala Lumpur Reporter (@KL_Reporter) July 9, 2021
“Mizaw tampi thlopnak electric mei, oxygen, vacuum ports le adang mizaw thlopnak caah a herhmi thilri vialte a um cia dih. COVID-19 mizaw pawl cu ihkhun nih a tlum hna zat thlop khawh an si ko lai,” tiah ralkap bawizik Tan Sri Affendi Buang (hmanthlak) nih a chim.
“Mawṭaw chiahnak dot i ihkhun 50 tlum COVID-19 mizaw thlopnak cu sizung hruaitu ralkap bawi Brig Gen D Rosman Ab Rahman le Lt Col Momamad Azlan Arrrifin nih an hruai chih lai.
“Ngandamnak Vuanci Zung le Rampumpi Poipang Tawlrelnak Zung he i bawm in ralkap sizung tang mawṭaw chiahnak, COVID-19 mizaw thlopnak caah kan tuah hi asi,” ati.
Malaysia cu lockdown an tuahnak thla 1 asi cang nain COVID-19 zawtnak ṭhat lei panh loin a zual chin lengmang. Tuni ah mizaw 9,180 an hmuh hna.
Chinmi 16 leng zong COVID-19 zawtnak nih a phak ve hna. An dam colhnak hnga le a zaw lomi Chinmi vialte zong hi pulrai chungin kan luatnak hnga khrihfabu lawng si loin pumpak zong nih thlacam cio hna usih. Ralring tein um usih law kan umnnak cozah nawl chuahmi felfai tein zul usih.
