Kuala Lumpur, Selangor, tbk., Malaysia cozah nih lockdown a tuahnak hmun um rawldawr (restaurant) pawl cu thaizing thokin 10pm tiang on khawh asi cang, tiah cozah nih tuni ah a thanh.
Runvennak Vuanci Pu Ismail nih, “atu lio cun zingka 6am in zaan 8pm tiang lawng on khawh an si nain, thaizing cun 10pm tiang onnak nawl pek dih nan si cang,” ati.
Lamkam tohmi rawldawr, mawṭaw rawl, food courts, restaurant, tbk. paoh 10pm tiang on khawh dih an si.
“Rian a ṭuanmi pawl cu inn ṭin pah in rawl cawk kan kal ah restaurant an khar cang i a har tuk … tiin ka Twitter account ah mi tampi nih nan ṭial caah 10pm tiang on caan kan sauh hi si.
“Cun, rawldawr tampi cu zaantlai hnu ah customer tam deuh an ngeih caah tuan tuk khar cu an sung tuk ti zong kan theih.
“Mipi le dawr ngeitu hmurka kan ngaih hnu ah 10pm tiang onnak nawl kan pek hna hi si,” ati.
Online rawl cahmi kuat (food delivery) zong 10pm tiang a ngah ve lai.
Sinain, dawr ah ṭhut cu a ngah rih hlei lo. I kalpi (takeaway/bungus) lawng asi rih lai.
