Malaysia: KL le Selangor um Chinmi vialte appointment hau loin raikhamsi chunh khawh asi

- Advertisement -

Kuala Lumpur le Selangor um ramdangmi vialte, UNHCR card ngei he ngei lo he appointment sok hau loin August 9 in 22 tiang raikhamsi chunh khawh asi, tiah Chin Refugee Committee (CRC) nih a thanh.

Chunhnak hmun cu Bukit Jalil Stadium [Grab ahcun PPV – Stadium Nasional Bukit Jalil (SNBJ)] ah si lai. August 9 in 11 tiang cu kum 40 cung lawng chunh asi lai. August 12 in 22 tiang khi kum 18 cung paoh chunh asi lai.

MySejahtera ah a sok nain appointment ngah rih lomi vialte zong kal khawh dih asi lai.

Malaysia rammi pawl cu August 2 in 22 tiang chunh asi lai. An rammi pawl cu hmun 9 bakah chunh an ngah nain Ramdangmi cu August 9 in 22 tiang asi lai i Sadium National Bukit Jalil lawngah chunh si lai.

Kuala Lumpur le Selangor ah COVID-19 zawtnak vantawng bakin a karh caah cozah nih appointment ngah rih lomi zong a rannak in COVID-19 khamnak si (raikhamsi) a chunh hna hi si.

COVID-19 pulrai in Malaysia Chinmi tamtuk kan zaw i tamtuk kan thi cang. Kan luatnak hnga COVID-19 khamnak si (raikhamsi) hi chunh khawh cio i zuam hna usih. Nan hawile zong rak kua cio hna uh.

CRC Thawngthanh: Covid-19: Raikham Sii Chunh Theihternak

Malaysia um Chin miphun hawikom dawt hna a tu lio kan boruak cu ngaihchia ngai kan si ko. Nan umnak cio ah ralring le daithlang lo tein um i zuam cio hram uh.

Hawikom/rualchan/chungkhar  pakhat le pakhat pehtlaihnak tuah khawh i zuam peng uh. Ruah lo pi in thil poipang chuah khawh a fawi. 

Raikham sii chunhnak kong he pehtlai in thawngthanh le theihter kan in duhmi hna cu August 9 – 22 karlak ah ramdangmi (ralzaam zong telh chih) poh raikham sii chunhnak an thawk cang lai. Min a pe rih lomi le a pe cang ko nain a ni le caan khiahpiak asi rih lomi kal khawh asi lai. 

Chunhnak hmum: Bukit Jalil Stadium 

A caan: 2 PM in zaan mui lai tiang

Theih ding le ken ding 1nak : Na umnak address tling tein (mei man bill kha a fiang bik).

Theih ding 2nak  : A hmun ah register (min khumnak) tuahter na si lai. Ballpen nan i ken dih lai. UN card/Catlap nei he nei lo he kal khawh asi lai.

Theih ding 3nak : August 9-11 tiang kha kum 40 in a cung lei an si hmasa lai i August 12-22 tiang kha kum 18 in a cung lei si lai. 

Theih ding 4nak: Klang valley a ummi caah asi. Klang Valley (KL le Selangor) ah a ummi ka si ti theihnak ah na address kha a herh hrimhrim. 

Theih ding 5 nak: Zawtnak dang a nei cia na si ahcun naa check (piahnak) doctor catialmi pawl kha i ken chih a hau lai. 

A karlak ah theih herhmi dang a um ahcun kan rak langhter than te lai. 

Siaherhnak he,
CRC Malaysia

Fianternak: Nawlngeitu nih thawng an thanhnak ahcun KL le Selangor ti loin ‘Klang Valley’ ummi vialte an ti. Klang Valley cu Chinmi tampi nih kan hngal lo sual lai ti kan phan caah a fian biknak in “KL le Selangor” kan tinak asi. Klang Valley ahcun KL, Putrajaya le Selangor state peng/district 4 an um. Klang tiva kuanghrawn um district vialte kha “Klang Nelrawn (Klang Valley) an ti ko hna cuh. Mah hna cu:

  1. Kuala Lumpur (Federal Territory)
  2. Petaling (Selangor state)
  3. Klang (Selangor state)
  4. Gombak (Selangor state)
  5. Hulu Langat (Selangor state) le
  6. Putrajaya (Federal Territory) hna an si.

Kuala Lumpur cu chim hau loin zapi theih asi ko (Bukit Bintang, Imbi, Pudu, Cheras, Ampang, Jalan Ipoh, Sentul, Sungei Besi, Loke Yew, tbk khua 40 leng vialte kha asi). Putrajaya cu Chinmi kan um lo caah chim hau lo.

Petaling hi Selangor state um Chinmi tambik kan umnak asi. Petaling peng/district ahcun khua 12:

  1. Petaling Jaya
  2. Puchong
  3. Subang Jaya
  4. Damansara
  5. Shah Alam
  6. Bukit Raja
  7. Kota Raja
  8. Bandar Sri Damansara
  9. Country Heights
  10. Puchong Jaya
  11. Puchong Perdana
  12. Serdang vialte hi an i tel dih.

Klang district ahcun khua 10:

  1. Kapar
  2. Shah Alam
  3. Meru
  4. Bandar Baru Klang
  5. Bukit Kemuning
  6. Pandamaran
  7. Pelabuhan Klang
  8. Telok Menegun
  9. Glenmarie Cove
  10. Batu 4 vialte an i tel dih.

Gombak district ahcun khua 11:

  1. Gombak
  2. Rawang
  3. Ampang (Ampang hrap cheu hi KL ah um i hrap cheu hi Gombak le Hulu Langat pengah um. Gombak le Hulu Langkat leikam Ampang hi Ampang Jaya ti zongin an auh. Ampang cu KL, Gombak le Hulu Langat pengri/ramri ah ummi si)
  4. Setapak
  5. Ulu Klang
  6. Selayang
  7. Kundang
  8. Kuang
  9. Batu Caves
  10. Sungai Buloh
  11. Kampung Sungai Pusu vialte an i tel.

Hulu Langat district ahcun khua 10:

  1. Kajang
  2. Ampang
  3. Cheras (Cheras hrap cheu hi KL ah um i hrap cheu hi Hulu Langat ah um. Cheras cu KL le Hulu Langkat pengri/ramri ah ummi si)
  4. Bangi
  5. Semenyih
  6. Beranang
  7. Bandar Baru Bangi
  8. Bandar Tun Hussein Onn
  9. Balakong
  10. Taman Sri Nanding an i tel.

Selangor state ahhin peng/district 9 um. Mah chungah Chinmi tamnak peng 4 (acunglei langhter cangmi pawl) lawng hi Klang Valley ah ummi an si. Adang peng 5 cu Klang Valley (raikhamsi chunh ngahmi hmun) ah an i tel lo, nain mah peng 5 ahcun Chinmi an um huaha lo, um lo ti khawh asi. Cucaah a fian biknak in KL le Selangor um Chinmi vialte kan ti.

Nan ti/mei bill kha zoh ulaw acunglei kan ṭialmi peng asiloah khua min aa tel paoh ahcun Klang Valley ah ummi na si i vai chunh khawh asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...