Malaysia khualipi Kuala Lumpur cu tilian ruangah atu mah ca kan ṭial lio tiang ahhin motor lam tampi an khar.
Nizaan tilian nih motor lam tampi thin tiangin a khuh dih. Atu hi ruahpi a han i tilian cu a kao cang nain lam cungah hnawm an khah dih caah motor le saikal kalnak caah ṭihnung tuk an si.
Cucaah motor lam tampi cu an khar i cozah rianṭuan pawl nih namchang in an thianh cuahmah hna lio asi.
Kuala Lumpur khua, Jalan Ipoh sangah zong tilian fak tukin a tlung i Hriphi khuami inn tampi ah ti a lut dih. Hriphi biakinn zong ti nih a phum dih i biakinnn seh thilri le fale cacawnnak sianginn thilri tangka thong tampi man an rawk sung dih.
Atutiang khar rihmi motor lam pawl cu;
- Jalan Tuanku Sultan Abdul Halim
- Jalan Rahmat
- Jalan Sentul Manis
- Jaalan Pahang Baarat le
- Smart Tunnel hna an si.
Khua hriang in khua lai kal a duhmi paoh cu lam hla deuh a simi Jalan Tun Razak lei in an kuaih ter dih hna.
“Motor le saikal aa citmi pawl nih lam kan kharmi hi pah chih lo tein nawl ngai uh. Mah lo cun lam tanṭim ah nan i tap lai i hohmanh kan rian hma a kal kho lai lo,” tiah lam bawi nih a chim.
Nizaan tihni chun hnu in nizaan zaanṭim tiang dong loin ruahpi a sur caah atu bantukin tiva an liam dih i khua chungah tilian a tlunnak hi si.
Tuni cu nikhua a ṭha tuk cang, a linh zong a lin pah ngai 28 degree celcius asi. Nain tu zaan muika hrawngin nikhua a chia lai i ruahpi a sur lai, tiah Nikhua Zung nih a thanh.
