Malaysia khualipi Kuala Lumpur ah tlanglawng 2 hmaitonh in an i pah

- Advertisement -

Minung 213 a phormi tlanglawng le a lawngmi tlanglawng cu hmaitonh in an i pah caah minung 213 hliam an tong, 64 sizung an phan. 6 cu an hma fah tuk caah mizaw zual thlopnak (ICU) ah an thlop hna.

KLCC ti zongin auhmi Kuala Lumpur um Malaysia inn sangbik 2nak Petronas Twin Towers pawng vawleitang tlanglawng lam ah an i pah hi si. KLCC satation le Kampung Baru station kar ah an i pah.

Kuala Lumpur cu vawlei an i zat lo (inn, zung le minung an tamtuk i lam an khah tuk) caah vawlei tang pe tampi thuk ah vawleitang tlanglawng lam (subway or underground train) tampi an tuah – Kuala Lumpur khuapi tang vawlei chung/tang ah tlanglawng le mawṭaw lam tampi um.

An i pah cu nizaan, Nikhatni zaan 8:33pm hrawngah asi. A lawngmi tlanglawng cu an remh kami si i an test liomi si. Khualtlawng phormi tlanglwang he lam 1 ah hmaitonh (opposite direction) in an kal caah hmaitonh in an i pah.

Malaysia ahcun tlanglawng lam 1 hi hmaitonh in an hmanmi tampi. Tlanglawng dirnak/station ah seh an bunh i hmaitonh in a rami tlanglawng he an i ton hlan ah lam cu seh in an dawh i khat lei lam ah an peh, khat lei lam ah tlawnglawng a lanh cangka in seh in an dawh ṭhan i hmaitonh in a rami kalnak caah hmasa lam ah an peh ṭhan tawn – a hmu bal lomi le engineer si lomi Laitlang ummi caah cun mithlam cuanter a har pah kho men.

Lam pakhat ah hmaitonh in a kalmi tlanglawng pawl cu an i pahnak hnga lo, minung nih mongh loin caan rikhiah in automatic in an kalter dih hna. Nain an test liomi tlanglawng hi cu minung nih a mongh caah a caan rikhiahmi he aa kaih lo i hmaitonh bakin minung phortu automatic tlangtlawng a pah hi si.

Tlanglawng aa citmi pawl cu thisen he tlanglawng ṭuang ah an ril dih hna. tlanglawng thlalangawng zong an kuai viar.

A tlawmbik minung 47 cu fak tukin hliam an tong. 166 cu fak tuk loin hliam an tong, tiah Kuala Lumpur palik bawizik Mohamad Zainal Abdullah nih a hmun ah thawngla pawl a chimh hna.

Tlanglawng company Prasarana nih, “Minung 64 sizung an phan, 6 cu mizaw zual thlopnak (ICU) khan ah an thlop hna,” tiah tuni ah a thanh.

“An i pahnak aruang cu kan hlat lio asi. Control centre le tlanglawng mongtu an i chawnhmi dik lo ruangah asi tiah kan zumh,” tiah palik bawi Abdullah nih a chim.

Lamsul Vuanci Wee Ka Siong nih a hmun ah thil sining a va zoh i, “Mah tlanglawng lam hi kum 23 chung kan hman cang i tutan hi avoi khatnak bik accident a chuah si,” tiah thawngla pawl a chimh hna.

Tlanglawng aa cit vemi kum 27 pa Baharudin nih, “An i pah hlan deuh ah tlanglawng cu minutes 15 chung hrawng a dir,” tiah a chim.

“Seconds 10 hrawng kan kal bakah kan i pah hi si. A pinh tuk ning hi khuaruahhar si.

“Dir buin aa citmi vialte cu an zuang dih. A ṭhumi pawl zong an i hlonh dih,” tiah a chim. Amah zong cu alu, ke le ṭang aa khawng i sizung phan ve.

Ram hruaitu Rampumpi Vuancichoh (Prime Minister) Muhyiddin Yassin nih, “Hihi thil hmete asi lo. Lamsul Vuanci Zung le tlanglawng company Prasarana cu an i pahnak aruang ṭha tein hlat dingin nawl ka pek hna,” tiah a thanh.

Tlanglawng company Prasarana nih, “Upadi ṭha tein kan zulh ko lai, upadi ningin tlanglawng aa citmi minung 213 cu RM1,000 cio kan liamh hna lai,” tiah a thanh.

“Sizung a phanmi pawl zong an dihmi kan liampiak hna lai i khawnden ruangah rianṭuan kho lomi zong an sungh dingmi lahkhah kan liamh hna lai,” ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...