Sarawak state, Malaysia — Hawikom he kaanche ah nuamhnak a kal i ti chungah a tlami Kawlram pa ruak an hmuh cang.
Sarawak Meithat le Mikhamhnak Zung nih, “ti chungah a tlami Aung Thu ruak cu Zarhpini zingka (January 19) ah kan hmuh cang,” tiah thawng a thanh.
A hawile Kawlrammi 6 he Sarawak state um Samalaju rili kam (kaanche) ah i nuam dingin an kal.
Zaan tlai hnu ah rili kam ah ti an i lio caah rili ti a kaimi le ti let nih a den hna i chuak kho ti loin a tlau.
“A tlaumi kong cu phone a kan chawnh caah kawl dingin Mi Kawl le Khamhtu team kan thlah hna.
“A ruak cu kaanche ah Zarhpini zingka 10:23am ah kan hmuh. A tlaunak hmun in 2.5km hrawng a hlatnak kaanche ah kan hmu,” tiah Meithat le Mikhamhnak Zung nih a thanh.
A ruak cu palek sinah an ap.
A hawile he kaanche pawngte ah a ummi Samalaju Industrial Estate ah rian a ṭuanmi an si.
Ralrin Peknak
Malaysia um Chinmi zong kaanche kal lio ah chuak kho ti loin a tlau i a thimi an rak um.
Rili ti cu zaanlei in kai aa thok i zaan tlai hnu ahcun tamtuk a kai caah chun ah tai can asi nak kha zaan ah tung phum tiang a phan kho. Cun, zaan ahcun ti let a pinh tuk caah ti let in den in chuah khawh ti lo tlau a tam tuk.
Chinmi hna a riak in kaanche nan kal tikah zaanlei ni tlak hnu cun ti chungah ttum hrimhrim hlah uh. Ti tlang aa naih tuknak zongah um hlah uh.
