Malaysia in Myanmar ram tlun a duhmi Kawlrammi 15,000 leng an um i anmah hna tlunnak caah vanlawng tlun ning/zat an chap lai.
Myanmar Tanzung lutlai changtu U Than Thwe nih, “Malaysia cozah nih hmasa ahcun tlun a duhmi Kawlrami hna caah Zarh khat ah vanlawng voi 1 lawng tlunnak nawl a pek.
“Nain, atu ahcun tlunnak voi 2 a chap caah Zarh khat ah vanlawng in voi 3 tlun khawh si cang lai.
“Aruang phunphung ruangah Malaysia a phan i Covid-19 zawtnak ruangah Myanmar ram tlung dingin min cazin a pekmi hi 15,000 leng an si.
“Min cazin a pekmi lakah phungning tein a ummi, lahwahkah thong (camp), le phungning loin a ummi an i tel hna.
“Cheukhat cu permit a hman lo, cheukhat catlap cahnah ah palhnak tlawmte a um ruangah lahwahkah camp ah chiahmi an um.
“Camp ah an phak ahcun Tanzung nih kan va ton hna i interview kan va tuah hna. Myanmar rammi an si/lo kan zohfel hnu ah CI kan pek hna.
“Myanmar ram tlung dingin min cazin a pe mi lakah interview kan tuah cangmi hna hi 2,500 in 3,000 kar an si lai. Interview tuah rih lomi zong an um rih. 3,000 in 4,000 an si lai. Phungning lo zeizat dah an si ti cu a dikthlir in kan chim kho lo nain 15,000 hrawng an si lai tiah kan zumh.
“Cunak zong in an tam kho. A hlan ahkhan tlung dingin min cazin an pek nain a hnu ah a tlung kho lomi zong an um len caah min cazin pekmi zeizat sat an si chim a har,” tiah a chim.
Malaysia cozah nih 2020 November tha in khan 2021 June tiang phungninglo ramdangmi tlunnak caan a pek hna. Dantat man RM500 lawng a lak chap rih hna.
Myanmar Tanzung ah Myanmar ram tlung dingin passport a sokmi hi nikhat ah minung 200 peng an si.
Covid-19 zawtnak um chungah Malaysia in Myanmar ram a tlung cangmi 7,500 leng an si cang.
Atu zong hi a dam lomi, nau pawimi pawl usape in tlunter an si lai.
Cun, lahwahkah thong (camp) zong ah a zengmi, a dam lomi le naupawi zong an um len caah anmah pawl cu usape in tlunter an si fawn lai. A tangmi pawl cu Tanzung biakhiahnak in tlunter an si lai.
